Sumqayıtın Mərkəzi Kitabxanası sanki mühasirəyə alınıb

Sumqayıtda bəzən obyekt yerləri çox yöndəmsiz, tikinti qanunvericiliyinə uyğun olmayan şəkildə və praktik olmayan formada tikilir. Bildiyimiz kimi, dünən şəhər rəhbərliyinin göstərişinə əsasən, Sumqayıtın Nəriman Nərimanov küçəsində "Nizami” kinoteatrının qarşısını kəsən vaxtilə nizamsız, qaydasız tikilən obyektlərin söküntüsünə başlanılıb. Kinoteatrın qarşısında olan "Qaramanlı" ayaqqabı mağazası, "Mübariz" Təmir Tkinti Şirkətinin binası artıq sökülüb və yol kənarında olan digər obyektlərin də söküləcəyi bildirilir. Məlumata görə yol genişləndiriləcək və ərazi abadlaşdırılacaq.
Xatırladaq ki, bu tip obyektlər Sumqayıtda bir xeyli sayda mövcuddur. Onlardan biri də düz Sumqayıt şəhər Səməd Vurğun adına Mərkəzi Kiitabxasının yanında tikilib. Təəssüf ki, bu obyekt sahibi kitabxanaya gələn oxucuların yolunu kəsib. Bu da oxucular tərəfindən narazılıqla qarşılanıb.
Üstəlik kitabxananın arxa hissəsində isə avtoyuma məntəqəsi də fəaliyyət göstərir ki, bu vəziyyətin daha da acınacaqlı olmasına gətirib çıxarır. Bir sözlə şəhərin mərkəzi kitabxanası hər tərəfdən sanki mühasirəyə alınıb. Yuyucu məntəqədə avtomobillərin yuyulması zaman yaranan səs-küydə düz kitabxanaın içərisinə yayılır. Kitabxanadan bildiriblər ki, bu obyekt ötən ilin payızında istifadəyə verilib. Kitabxana rəhbərliyi dəfələrlə obyekt sahibinə oxuculara mane olduqlarını bildirib və bir müddət yuyucu məntəqədə avtomobillərə iş saatı bitdikdən sonra xidmət göstərilib. Gəl ki, bu çox da uzun sürməyib. Vədinə xilaf çıxan obyekt sahibi yenidən iş saatlarında fəaliyyətini davam etdirib. İş o yerə çatıb ki, yağış yağanda kitabxana işçiləri sevincək olur ki, yuyucu məntəqə həmin günü fəaliyyət göstərməyəcək və onlar da bu narahatçılıqdan bir müddət xilas olacaqlar.

Hələ may ayında Sumqayıt.TV ərazidən videoreportaj hazırlamışdı. O zaman Xeberle.com portalında bu reportajı təqdim etdik, lakin şəhər rəhbərliyi tərəfindən heç bir reaksiya görmədik. Ümidvarıq ki, şəhərin yeni icra hakimi Zakir Fərəcov bu məsələyə operativ reaksiya verəcək və problem tezliklə həllini tapacaq.