"Azərbaycanda saat zavodu açmaq istəyərəm”
Gənclər bizim gələcəyimizdir. Bu gün həyatın bütün sahələrində quruculuq işlərinin sükanı arxasında olan orta və yaşlı nəsili sabah gənclər əvəz edəcək. Bu baxımdan hər bir cəmiyyətin sağlam düşüncəli, təfəkkürlü gənclərə böyük ehtiyacı var. "Gənclər paytaxtı” olan Sumqayıtdan da zaman-zaman istedadlı gənclər çıxıb. Xeberle.com-un əməkdaşı həm saatsaz, həm tar ifaçısı olan sumqayıtlı gənc Alişan Cabbarlı ilə həmsöhbət olub.
- Özünüz haqqında məlumat verin.
Mən Cabbarlı Alişan Fuad oğlu 2005-ci il noyabr ayının 9-da Sumqayıt şəhərində doğulmuşam. 2011-2022-ci illərdə Sumqayıt Şəhəri İsmət Qayıbov adına 1 nömrəli tam orta məktəbdə təhsil almışam. 2022-ci ildə Sumqayıt Dövlət Universitetinin Tarix ixtisasına daxil olmuşam. Hazırda isə III kursda oxuyuram.
- Bir qədər saatsaz sənətinin sirlərini açmanızı istərdim.
Saatsazlıq sənəti çox maraqlı, dəqiq və eyni zamanda çətin sənətdir. Bizim işimiz zərgər dəqiqliyi tələb edir. Öncəliklə deyim ki, mən bu işi maddiyyat üçün istəsəydim heç vaxt qabağa gedə bilməzdim. Marağımın və xəyallarımın ardınca gedərək bu sənətimi inkişaf etdirmişəm.
- Bərpa edə bilməyib məyuslandığınız saat olubmu?
Bərpa edə bilmədiyim saat yadıma gəlmir. Əsasən düzəltdiyim saatlar original retro saatlar olur. Bu gün retro saatlar yenidən dəbə düşüb. Buna görə də insanların əllərindəki saatları düzəltdirib taxmağa maraqları artıb. Təbii ki, həmin saatları hər kəs düzəltməyi bacarmır. Şəhərimizdə öz sözün demiş ustalarımız olsa da, bununla bərabər saxta saatsazlar da meydana çıxıb.
- Ən bahalı və ən ucuz hansı saatları təmir etmisiniz?
Ən baha təmir etdiyim saat "xronoqraf” saatlar olub. Bu saatların qiyməti 7 min AZN-dir. Başlanğıcda ancaq sovetin divar saatların təmir etmişəm. Qol saatına olan marağım sonradan başlayıb.
- Eyni zamanda tarda ifa edirsiniz. Bu haqda fikirlərinizi öyrənmək istərdik.
Muğama olan həvəsim lap balacalığımdan olub. Babam hər zaman muğama qulaq asardı. Onunla birlikdə köhnə vallarda muğamı dinləyərdim. Bizim evdə hər zaman muğam sədası eşidilib. Buna görə də atam və anam mənim tar məktəbinə daxil olmağımı istəyirdilər. Oran 5 il oxudum. İnsan musiqini dinlədikdə sanki dəryaya dalır, üstəlik özü ifa edəndə isə bu bir başqa olur.
- Hansı sənətinizi daha çox sevirsiniz?
İnsan hər barmağını necə sevirsə, mənim də hər sənətim özüm üçün çox əzizdir.
- Sumqayıtda hansı yenilikləri görmək istərdiniz?
Sumqayıtda əsasən yeni peşə məktəblərinin, yeni zavodların açılmasını istəyərəm. Düşünürəm ki, sənətə marağı olan gənclərimizin daha yaxşı şəraitdə işləyib və təhsil alması vacibdir. İstedadlı insanlara yol açılması mütləqdir.
- Sumqayıt təhsil haqqında fikirlərinizi b ilmək istərdik.
Sumqayıt təhsili ilə bağlı fikirlərim müsbətdir. Lakin, bəzi məktəb və tədris ocaqlarında yaşı 65-i keçmiş çox savadlı müəllimlərimizin işinə davam etməyini istəyərəm. Hazırda çox savadlı müəllimlərimiz var ki, təqaüddədirlər. İstəyərəm ki, onlar yenidən öz işlərinə davam etsinlər.
- Gələcəklə bağlı planlarınız nədir?
Gələcəkdə Azərbaycanda saat zavodu açmaq istəyərəm. Bu uşaqlıqdan arzum olub. Marağı olan insanların orada çalışıb öyrənməsi və xarici saat zavodlarında sənətimi daha da irəlilətmək istəyərəm.
- Bizə vaxt ayırdığınız üçün təşkkür edirik.
Təşəkkür edirik.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
