Saray MTK-nın bəzi sakinləri rəhbərlik barəsində ciddi iddialar səsləndiriblər.
Sakinlərin Xeberle.com-a bildirdiyinə görə, MTK rəhbərliyində təmsil olunan Hafiz adlı şəxs balkona pəncərə quraşdırmaq istəyən vətəndaşlardan 200 manat ödəniş tələb edir.
İddialara görə, sakinlər balkonu bağlamağa məcburdurlar: həm soyuqdan qorunmaq, həm də təhlükəsizlik məqsədilə. Məlumat verən şəxslər bildirirlər ki, bu yaxınlarda binada 2 yaşlı bir uşağın balkondan yıxılaraq ölməsi hadisəsindən sonra ailələr daha da narahat olub və təhlükəsizlik üçün pəncərə quraşdırmağa çalışırlar.
Şikayətçilərin sözlərinə görə, MTK rəhbərliyinə ödəniş edilmədikdə, ustaların pəncərəni qaldırmasına icazə verilmir. Lakin iddia olunur ki, 200 manat verən kimi bütün "qadağalar" aradan qalxır və quraşdırma prosesinə maneələr olmur.
Sakinlər bu vəziyyətin həm sosial, həm də təhlükəsizlik baxımından qəbuledilməz olduğunu bildirir və müvafiq qurumları məsələyə müdaxilə etməyə çağırırlar.
Xəbərdən istifadə edərkən istinad etmək vacibdir.
