Şəhərimizin Kimyaçılar mədəniyyət evinin yaxınlığındakı məşhur ölüm saçan döngəsindən çoxunuzun xəbəri var. Əvvəl ora avtomobil yolu olub. Lakin sonradan təmir işləri aparılıb, mədəniyyət evinin qabağına piltə daşlar döşənib və avtomobil yolu yığışdırılıb. O gündən də həmin döngə çevirilib olub "ölüm döngəsi". O gün olmur ki, burda qəza olmasın. Bunun da səbəbi sadədir. Qeyd etdiyimiz kimi, əvvəl bura avtomobil yolu olub. Bundan başqa, parkın 9-cu mikrorayon tərəfdə olan maşın yolunun işıqları və ordan keçən avtomobillər bu başdan elə görüntü yaradır ki, sanki "Kimyaçılar” sarayının qabağı açıqdır. Məhz bu amil də sürücüləri çaşdırır.
Elə ötən gecədə döngədə növbəti ağır yol qəzası baş verib. Qara rəngli markası bilinməyən avtomobil döngəni dönərkən yenə hündür bardürə çırpılıb və ardınca zibil qutusunu da sürüyərək 20-30 metr kənarda dayanıb. Dərhal ətrafdakı insanların köməyi ilə sürücü avtomobildən çıxardılıb. Xoşbəxtlikdən sürücü ağır bədən xəsarəti almasa da, şok keçirdiyi hiss olunurdu. Dərhal hadisə yerinə yol polisinin və post patrul xidmətinin əməkdaşları gəlib.
Bizə anlaşılmayan bir məqamdır. Görəsən o döngəyə hansısa nişan, işarə qoymaq belə çətindir? Yoxsa tez-tez baş verən qəzalar kimlərinsə marağına xidmət edir? Xidmət etmirsə, niyə bu döngəyə bir əncam çəkmirlər? Yoxsa gözləyirlər ki, daha dəhşətli, daha ağır qəza olsun, insan itkisi olsun sonra tədbir görsünlər?!

Anar, Xeberle.com