"Sumqayıtda mövcud olan bağçalarda olan yerlərin sayı tələbatın 25 faizini ödəyir. Daxil olan şikayətlər əsasında demək olar ki, bir sıra bağça müdirləri valideynlərdən ödəniş müqabilində övladlarını bağçaya götürürlər”.

Şəhər hesabat yığncağında çıxış edən Sumqayıt şəhər İcra hakimiyyəti Başçısının müavini Lalə Hacıyeva bildirib ki, 22 ("Qaranquş” uşaq bağçası, müdir Aygün Səfərəliyeva), 39("Abdulla Şaiq” adına uşaq bağçası, müdir Esmira Musayeva), 56 ("Baharcıq” uşaq bağçası, Adilə İbrahimova), 63("Venera” uşaq bağçası, müdir, Mehparə Məmmədova) saylı və sairə bağçalarda bu cür faktlar mövcud olub. Bu bağçaların müdirlərinə xəbərdarlıq edilib.

L. Hacıyevanın bağçalarla bağlı söylədiyi fikirlərə münasibət bildirən Sumqayıt şəhər İcra hakimiyyətinin Başçısı Eldar Əzizov qeyd edib ki, bağçalarda baş verən neqativ hallarla bağlı şikayət edənlərinn sayı çoxalıb: "Elə bir həftə yoxdur ki, şəhər icra hakimiyyətinə bağçalarda valideyndən pul tələb edilməsi ilə bağlı şikayət məktubu daxil olmasın. Mən bu uşaq bağçalarının müdirlərinə müraciət edib soruşuram. İcra hakimiyyətindən və yaxud başqa strukturlardan sizdən kimsə nəsə tələb edibmi? Nə qədər bu məsələni demək olar? Neçəsini bununla bağlı işdən azad etdik. Adlarını çəkdiyiniz bağça müdirlərini işdən azad edib prokurorluğa təqdim etmək lazımdır. Bundan sonra xəbərdarlıq deyil, əməli tədbirlər olmalıdır. Sakinlərə də müraciət edib deyirəm ki, icra hakimiyyətinin "Qaynar xətti” var. Problemlərlə bağlı müraciət edin.”

Xeberle.com