Azərbaycanın şəhərsalma standartlarına görə ən ideal şəhəri Sumqayıt hesab oluna bilər. Ancaq bəzən bu şəhəri də korlayanlar tapılır.
Misal üçün, şəhərin 9-cu mikrorayonunda bina tikmək istəyənlər şəhərsalma qaydalarını kobud şəkildə pozaraq səkiləri işğal ediblər. Sakinlərin yoluna da göz dikiblər. Mikrorayon sakinləri  bildiriblər ki, işğal olunmuş səki Üzeyir Hacıbəyov küçəsindən 9-cu mikrorayonun içinə gedən yoldadır. Yolun kənarındakı torpaq sahəsi daş hasara alınıb. Həmin hasar avtomobil yoluna qədər dirənib. Piyada gediş-gəlişi üçün yer qalmadığı üçün sakinlər maşın yolu ilə getmək məcburiyyətində qalırlar. Yağışlı havalarda həmin ərazidə gölməçələr yarandığı üçün piyadaların işi daha da çətinləşir.
Məsələyə aydınlıq gətirmək üçün Sumqayıt Şəhər Memarlıq və Şəhərsalma İdarəsi ilə əlaqə saxladıq. Qurumun mühəndisi Kamil Məmmədov əvvəlcə həmin hadisədən xəbərsiz olduğunu bildirdi. Əraziyə baxış keçirdikdən sonra dedi ki, qaydaları pozanlar qeydə alınıblar. Onlar barəsində müvafiq tədbir görüləcək.(milli.az)
Xeberle.com