Hökumətin rayon qeydiyyat nömrəli avtomobillərin Bakıya gündüz saatlarında buraxılmaması barədə qərarı Bakı-Sumqayıt yolunda özbaşınalıq hallarına rəvac verir.
Bununla bağlı redaksiyamıza məlumat verən şikayətçilərin bildirdiklərinə görə, yol polisləri hətta maşında xəstə olsa da buraxmırlar, amma hansısa xanım sürücünü, yaxud Lifan markalı əlil maşınlarını görəndə özlərini görməməzliyə vurur Bakıya  Sumqayıt nömrəsi ilə daxil olmasına şərait yaradırlar.

Şikayətçilər bildirirlər ki, hətta Sumqayıtdan Bakıya və əks istiqamətdə nömrəsiz Lifanlarla taksi fəaliyyəti göstərənlər var və onlara "gözün üstə qaşın var” deyən yoxdur. Bundan əlavə polisin ümumiyyətlə gözündən yayınanlar da olur. Məsələn elə bu videodakı kimi. Oxucularımızdan birinin  göndərdiyi videoda Sumqayıt seriyalı avtomobil artıq Xırdalan qəbristanlığının yanında görüntülənir.  Oxucumuz bildirir ki, həmin avtomobil  bütün polis postlarını maneəsiz keçərək gündüz saat 11-12 radələrində maneəsiz Bakıya daxil ola bilib.

Ümumiyyətlə şikayətçilər yol polisindən narazılıq edərək bildirirlər ki, yol polisləri qəsdən insanları narazı salırlar. Sumqayıtdan Bakıya təkcə xəstələr getmir, avtomobilini servisə aparanlar da, ailəsi ilə birlikdə toya gedənlər də, işə gedənlər də olur. Sumqayıt əhalisinin böyük əksəriyyətinin Bakıda işləyib ailəsinə çörək pulu qazandığını nəzərə alsaq Abşeron qeydiyyatında olan avtomobillər kimi Sumqayıt avtomobillərinin də Bakıya maneəsiz buraxılması əksər insanların arzusudur.

Sözügedən videonu təqdim edir və ümid edirik ki, yol polisi rəhbərliyi öz əməkdaşlarına vətəndaşlar arasında ayrı-seçkilik salmamaqla bağlı sonuncu qəti xəbərdarlığını edəcək.

Qarşı tərəfin də mövqeyini dərc etməyə hazırıq.(yenilik.az)