Talelərin şəhəri - Sumqayıt

Orta məktəbi bitirəndən taleyimi Sumqayıtla bağlamışam. Bu da təxminən qırx illik bir dövrü əhatə edir. 66 yaşlı Sumqayıt ötən dövr ərzində yüz minlərlə insanın tale şəhərinə çevrilib. Azərbaycanın müxtəlif guşlələrindən bura işləməyə, oxumağa gələn insanlar buranı özləri üçün yaşayış məskəni seçmiş, ailə həyatı quraraq öz xoşbəxtliklərini bu şəhərdə tapmışlar. Bu şəhər həmişə yüksək potensiallı kadrları ilə seçilib. Buradan pərvaz edən gənc ali təhsilli kadrlar bu gün istər Prezident Adminstrasiyasında, istər müxtəlif nazirliklərdə, istərsə də digər dövlət qurumlarında uğurla fəaliyyət göstərir, həmçinin müxtəlif ali təhsil ocaqlarında gənclərimizin sabahın mütəxəssisləri kimi hazırlanmasında əllərindən gələni əsirgəmirlər. Sumqayıt görkəmli elm sahibləri, ədəbiyyat və mədəniyyət nümayəndələri, şair və yazıçıları ilə də həmişə digər bölgələrə örnək olmuşdur. Bu insanlar 66 il ərzində Sumqayıtın şöhrətinə bir az da şöhrət qatmış, özləri də bu şəhərlə birgə şöhrət zirvəsinə ucalmışlar.

Dağıdılan Sumqayıt

Bu illər ərzində Sumqayıt şəhərində istər birinci katib, istərsə də icra başçısı kimi çox insanlar rəhbərlik edib. Onlardan son dördü üzərində dayanmaq istəyərdim – Şakir Abuşov, Təvəkkül Məmmədov, Vaqif Əliyev və Eldar Əzizov.İlk üç icra başçısı bu gün də sumqayıtlılar tərəfindən xoş duyğularla xatırlanır (Allah hər üçünə uzun ömür versin).

Amma çox təəssüflər olsun ki, Eldar Əzizov və onun komandası ilə bağlı bu xoş sözləri demək mümkün deyil. Onlar gələndən sonra kimə gəldi, necə gəldi obyektlər tikmək üçün sərəncamlar verməyə, onların işinə yaramayanların isə obyektlərini söküb-dağıtmağa başladılar. Eyni haqsızlıqları bunlar Ulu öndərin adını daşıyan parkda da icra etdilər. Burada 3 əsas tikili, 19-u isə müvəqqəti tikilidən ibarət olmaqla müxtəlif istiqamətli 22 obyekt var idi. Onlar bu obyektləri yerlə-yeksan edərək əvəzində özləri üçün yeni obyektlər inşa etdilər.

Vaxt var idi ermənilərin Topxana meşəsindəki ağacları kəsməsinə etiraz əlaməti olaraq bütün Azərbaycan ayağa qalxdı və bu vandalizmə qarşı yumruq kimi birləşdi. Güman edirəm ki, Ulu öndər Heydər Əliyevin bir vaxtlar dediyi sözlər heç kimin yadından çıxmayıb. Ümummilli lider deyirdi ki, kim bir ağac kəsərsə, o mənim bir qolumu kəsmiş olur. Amma Eldar Əzizovun vaxtında məmurlar başlarının üstündən Ulu öndərin və Prezident İlham Əliyevin portretlərini aşaraq dövlət başçısının siyasətinə, göstərişlərinə etinasız yanaşır, Sumqayıtın bütün mikrorayon və məhəllələrində 10 illik, 20 illik ağaclara qarşı soyqırım aktı törədir, yerində isə ticarət obyektləri ucaldırdılar. Pul bu insanların gözünü tutduğundan, ürəkləri pul ilə döyündüyündən demək olar ki, şəhərin hər güşəsində özbaşınalıq hökm sürürdü.

Sumqayıtda sökülən obyektlər, verilən vədlər

Yazıçılara, jurnalistlərə, ədəbiyyat və mədəniyyət işçilərinə məhəl qoyulmur, onların keçirmək istədikləri tədbirlərin qarşısı sərt şəkildə alınırdı. Şəhid ailələrinin, qarabağ müharibəsi əlillərinin, veteranların da qeydinə qalan, onların problemi ilə maraqlanan yox idi. Mən özüm qələm əhliyəm. 25 illik bir dövr ərzində Qarabağ müharibəsi, 20 Yanvar qırğını və Xocalı soyqırımı ilə bağlı onlarla məqalə, şeir və poema yazaraq müxtəlif mətbu orqanlarda çap etdirmişəm.

Bu şeir və poemalar əsasında videoçarxlar hazırlayaraq internet vasitəsilə bu dərdləri bütün dünyaya bəyan etmiş, ermənilərin iç üzünü dünya ictimaiyyətinə göstərməyə çalışmışam. əvəzində isə Eldar Əzizovun komandası tərəfindən Ulu öndərin adını daşıyan parkdakı əsaslı tikiliyə malik, sənədli-sübutlu, min bir zəhmətlə qazandığım pulla aldığım "Aysberq” kafesi yerlə-yeksan olunub. Mənə vəd verilsə də, bunun əvəzində yeni layihə əsasında, müasir üslubda bir obyekt tikilib sənə veriləcək, bəd ayaqda isə bundan da geniş torpaq sahəsi ayrılmaqla tikinti üçün maddi dəstək olunacaq. Buna baxmayaraq onlar vədlərinə xilaf çıxdılar. Mənə nə obyekt verildi, nə də torpaq sahəsi ayrıldı. Böyük bir ailənin yeganə gəlir mənbəyi olan bir obyekti tari-mar edilə, sizcə o ailənin vəziyyəti necə olar?! Bunu siz özünüz təsəvvür edin, dəyərli oxucular.

Sumqayıtın sabahına ümidlər

Hamının əli duada idi ki, görəsən bu adam buradan nə zaman kənarlaşdırılacaq? Sizi inandırım ki, Eldar Əzizovun Sumqayıt şəhər İcra Hakimiyyətinin başçısı vəzifəsindən azad olunması ilə bağlı möhtərəm Prezidentin sərəncam imzaladığı gün bəlkə də sumqayıtlıların ən xoşbəxt və sevincli günlərindən biri idi.

Hörmətli Zakir Fərəcovun Sumqayıta icra başçısı təyin olunması bu sevincin üstünə bir sevinc də əlavə olundu. Çünki Zakir Fərəcovsumqayıtlı idi, eyni zamanda sumqayıtlılar üçün doğma admdır. Sumqayıtlılar Zakir Fərəcovu yaxşı tanıyır və ona böyük ümidlər bəsləyirlər. Həmçinin Sumqayıtın problemləri də Zakir Fərəcov üçün məlum və doğma problemlərdir. Zakir Fərəcov yaxşı bilir ki, sumqayıtlılar çalışqandırlar, zəhmətkeşdirlər, istəsələr dağı dağ üstə qoyarlar. Bunun müqabilində isə umacaqları çox cüzidir.

Sumqayıtlılar nə istəyir? Sumqayıtlılar istəyir ki, onların övladları məktəbə, bağçaya palçığını içində yox, asfalt yolla gedib gəlsinlər. Gecələr həyətlərini zülmətə qərq olmasın, binlaraının zirzəmiləri təmiz olsun ki, ətrafı üfunət bürüməsin, təqaüdçülərin asudə vaxtlarındaoturub söhbət etmələriüçün həyətlərində bir guşələri olsun. Şəhərin bütün məhəllə və mikrorayonları istilik sistemi ilə təcjiz olunsun. Qışda evin içində yorğana bürünüb oturmasınlar və i.a. Gördüyünüz kimi bunlar elə də ciddi və külli miqdarda vəsait tələb olunan problemlər deyil.

Mən inanıram ki, sumqayıtlıların dərdini bizdən yaxşı bilən hörmətli Zakir Fərəcov qısa müddət ərzində bu problemlərin aradan qaldırılılması üçün əlaqədar qurumları hərəkətə gətirərək, sumqayıtlıların sosila rifah halının yaxşılaşdırılmasına yönəlik tədbirləri ilə bütün məqamlarda sumqayıtlıların yanında və onlarla birgə olduğunu sübut edəcəkdir. Mən buna bütün varlığımla inanır və çox hörmətli icra başçımıza bu çətin və məsuliyyətli işində yeni-yeni müvəffəqiyyətlər arzulayıram.

Əli Rafiq

Azərbaycan Yazıçılar və

Jurnalistlər Birliklərinin üzvü