Sumqayıt Şəhər İcra Hakimiyyətinin başçısı Zakir Fərəcov şəhərə rəhbər təyin olunduğu gündən şəhərin bütün məhəllə və mikrorayonlarının, qəsəbələrin o cümlədən təhsil, səhiyyə və mədəniyyət müəssisələrinin, şəhər təsərrüfatının və bir çox strukturların vəziyyəti ilə yaxından tanış olub, şəhər ictimaiyyətinin çoxsaylı nümayəndələri, xüsusilə də şəhərin ağsaqqaları, fəal gəncləri, təhsil, səhiyyə və mədəniyyət işçiləri ilə görüşlər keçirib.

Xeberle.com-a verilən məlumata görə növbəti görüşlərdən biri də bu gün Hacı Zeynalabdin qəsəbəsində olub. Qəsəbədə yerləşən 6 saylı tam orta məktəbdə keçirilən görüş zamanı Zakir Fərəcov təyin olunduğu gündən Sumqayıt şəhərində irimiqyaslı abadlıq-quruculuq işlərinin həyata keçirildiyini, təhsil, səhiyyə və digər sahələrdə mövcud olan neqativ halların aradan qaldırılması istiqamətində ciddi işlərin görüldüyünü qeyd etməklə, şəhərdə həyata keçirilməsi nəzərdə tutulan inkişaf perspektivləri barədə geniş məlumat verib. Eyni zamanda İcra başçısı qəsəbədə mövcud problemlərə də toxunub. Belə ki, qəsəbədəki Mədəniyyət evi ötən əsrin ortalarında istismara verildiyindən, 4 saylı uşaq poliklinikasının qəzalı vəziyyətə düşdüyündən, onların əsaslı təmirə və qəsəbədə İdman Kompleksinin inşasına böyük ehtiyacın olduğunu vurğulayıb.

Sumqayıt Şəhər İcra Hakimiyyətinin başçısı Zakir Fərəcov qəsəbə sakinləri ilə birbaşa səmimi dialoq zamanı sakinlərin problemlərini diqqətlə dinləyib, vətəndaşların müraciətlərinə operativ münasibət bildirib. Sakinlərlə görüş zamanı şəhid ailəsinin fərdi evinin tikintisində sənədləşməylə bağlı problem, H.Zeynalabdin qəsəbəsində "Şirvan dəmiryol” yaşayış massivində əvvəllər Azərbaycan Dövlət Dəmiryolları QSC-yə məxsus və hal-hazırda İcra Hakimiyyətinin balansına verilmiş xidməti mənzillərin sənədləşdirilməsi məsələsi və ərazidə yeni elektrik transformatoru quraşdırılmaqla, yaşayış massivindəki elektrik enerjisinin verilişində mövcud problemlərinin həll olunmasına dair tapşırıqlar verib. Qəsəbə sakinləri şəhərin rəhbəri ilə dialoqda fəal iştirak ediblər, Hacı Zeynalabdin qəsəbəsinin "Şirvan dəmir yol” yaşayış massivində uşaq bağçasının istilik sisteminin və dam örtüyünün yenidən qurması ilə bağlı İcra Hakimiyyətinin başçısına öz təşəkkürlərini bildiriblər.
Xeberle.com