Rüşvət və korrupsiya indiyə kimi çoxlarının evini yıxıb, çırağını söndürüb. Yəqin fikir vermisiniz ki, son illər ərzində ölkəmizdə rüşvət üstündə bir çox vəzifəli şəxs həbs edilib. Korrupsiyaya qarşı həyata keçirilən mübarizə tədbirlərini bir vətəndaş, eyni zamanda jurnalist olaraq müsbət qarşılayıram. Tamahına aldanan məmurlara ağır cəza verilməlidir. Bildiyiniz kimi, son günlərin ən çox danışılan hadisələrindən biri Sumqayıt Dövlət Universitetinin 1-ci kurs tələbəsi Rumiyyə Qasımovanın özünü öldürməsidir. Bu intihar xəbəri artıq bir neçə gündür ki, ölkə mediasının əsas müzakirə mövzusuna çevrilib. Hansı ki, universitet rəsmiləri bu xəbəri mətbuatdan gizlətməyə çalışırdı. Gənc qızın ölümü bir çoxları kimi mənə də pis təsir edib. Deyilənə görə, onun canına qəsd etməsinə imtahandan kəsilməsi səbəb olub. Bəziləri isə bildirir ki, Rumiyyə imtahan üçün tələb olunan pulu vermədiyi üçün kəsilib və bundan sonra özünü öldürmək qərarına gəlib. Dünən Rumiyyə Qasımovanın atası Elşən Qasımov mətbuata qızından imtahana görə pul tələb edildiyini təsdiqləyib. Amma ali məktəbin məsul şəxsləri ölümün imtahana görə olmadığını iddia etməyə çalışırdılar. Valideyn üçün övlad itirməkdən ağır dərd ola bilməz. Elşən Qasımovun dərdinə şərikik. O bu hadisə ilə bağlı ən yuxarı instansiyalara müraciət edəcəyini deyib. Qeyd edim ki, bu intihar hadisəsi diqqətləri bir daha təhsil ocaqlarına, xüsusi olaraq da universitetlərdəki özbaşınalığa yönəltdi. Təhsil naziri Mikayıl Cabbarov demək olar ki, hər çıxışında təhsil sahəsində rüşvət və korrupsiya hallarının azaldığını bildirir. Əgər durum həqiqətən də bu cürdürsə, gənc tələbə özünü niyə öldürürdü? Deməli, Təhsil Nazirliyinin rəhbər şəxslərinin ali məktəblər üzərindəki nəzarəti istənilən səviyyədə deyil. Mikayıl Cabbarov sanki rektorlardan çəkinir, yaxud özü qəsdən bəzi ali təhsil ocaqlarında cərəyan edən qanun pozuntularını görməzdən gəlir. Ya da nazirliyin bəzi əməkdaşları ali məktəblərdə baş alıb gedən nöqsanları nazirdən gizlədirlər. Məhz bu biganə münasibətin nəticəsidir ki, imtahandan kəsilən tələbə özünü öldürdü. Başqa tələbələrin də bu yola əl atmayacağına heç kim zəmanət vermir. Kim bilir Rumiyyə yaşasaydı, gələcəkdə Vətəni, dövləti üçün savadlı, ziyalı kadr olacaqdı. Lakin bəzi tamahkar şəxslərin qanundan kənar əməli ucbatından bu gənc qızın həyat ulduzu erkən söndü. Onun ölümü əslində, cəmiyyətə, valideynlərə bir siqnaldır. Ki, artıq rüşvət verməkdən əl çəkin. Bu gün bəzi valideynlər nəyəsə, yəni hansısa səbəblərə görə övladının pozulmuş hüquqlarını müdafiə edə bilmir. Bəlkə də dünyada yeganə millətik ki, oxumamaq üçün müəllimlərə, direktorlara və rektorlara rüşvət veririk. Müəllimləri, məktəb direktorlarını, universitet rektorlarını, dekanları pis öyrədən elə valideynlərdir. Hər kəs təhsil ocaqlarında mövcud olan rüşvət və korrupsiyaya qarşı çıxsa, nəticəsi bu cür olmaz. Fikrimcə, Rumiyyənin atası, anası, yaxın qohumları hadisəyə səbəb olan amillərin araşdırılmasını aidiyyəti hüquq-mühafizə orqanlarından xahiş etməlidir. Heç olmasa, həmin günahkar şəxslər cəzalandırılsın ki, gələcəkdə belə bədbəxt hadisələr təkrarlanmasın. (gundelik-baku.com)
Pərvin Mahmud