Bildiyimiz kimi, Sumqayıt şəhəri salındığı vaxtdan indiyə kimi ölkənin kadr bazası hesab olunub. Təsadüfi deyil ki, istənilən sahəyə nəzər yetirsək, Sumqayıtdan olan kadrların çoxluq təşkil etdiyini görərik. Bu kadrlar çoxluq təşkil etməklə yanaşı, həm də aparıcı qüvvə olub, həm kəmiyyət, həm də kefiyyət etibarilə. Mədəniyyət sahəsində də sumqayıtlılar ön sıralardadır desək, yanılmarıq. Ötən əsrin ortalarından indəyə kimi tanınmış simalar yetişdirən Sumqayıtın Azərbaycan mədəniyyətində bu gün də öz layiqli yeri var. Öncə bunu qeyd edək ki, Sumqayıt şəhər Mədəniyyət və Turizm İdarəsinin tərkibində beş musiqi məktəbi, on səkkiz kitabxana, altı mədəniyyət evi, üç klub və poeziya evi fəaliyyət göstərir. Sumqayıtda fəaliyyətdə olan digər mədəni qurum isə Sumqayıt Dövlət Dram Teatrıdır ki, o da birbaşa aidiyyəti nazirliyə tabedir.
"Qazanılan gəlir birinci növbədə mədəniyyətə sərf olunmalıdır. Çünki mədəniyyət hər şeydən üstündür.” Heydər Əliyev
Şəhərimiz yaranandan bu yana bir çox rəhbərlər görüb. Və hər biri də mədəniyyətə xüsusi töhfə verib desək, yanılmarıq. Bildiyimiz kimi, Sumqayıtda növbəti rəhbər dəyişikliyi ötən ilin sentyabr ayında baş verdi - Zakir Fərəcov icra başçısı təyin olundu. Baxmayaraq ki, Sumqayıt onun üçün yad deyil, əksinə doğma şəhərdir yeni rəhbər elə ilk günlərdən başlayaraq şəhərin problemlərini daha dərindən bilmək üçün bütün sahələrə aid müəssələrdə oldu və problemlərlə maraqlandı. Elə ilk diqqət ayrılan sahələrdən biri də mədəniyyət oldu. Belə ki, icra başçısının birbaşa göstərişi ilə Sumqayıtda böyük Heydər Əliyev mərkəzinin tikintisnə start verildi. Məlumat üçün bildirək ki, dörd mərtəbədən ibarət olacaq bu tikili ölkədə ən iri mərkəz kimi tarixə düşəcək. Sumqayıtda bununla yanaşı, musiqi və şahmat məktəbinin, həmçinin şəhər üçün ən önəmli olan, ölkə rəhbərinin də birbaşa diqqətdə saxladığı Sumqayıt bulvarının tikintisinə başlanılıb. Eyni zamanda teatrın yenidən əsaslı təmirinə start verilib. Artıq yaxın müddət ərzində adıçəkilən bu mədəniyyət və istirahət obyektlərinin istifadəyə verilməsi nəzərdə tutulub.














Maraqlıdır, görəsən, bu diqqətin qarşılığında Sumqayıt mədəniyyəti öz sözünü deyə bilirmi? Ümumiyyətlə, son dövrlərdə şəhərdə hansı mədəni tədbirlər keçirilir? Nəzərinizə çatdıraq ki, Sumqayıtda son üç ay ərzində keçirilən irili-xırdalı tədbirlərin sayı yüzü ötüb. Bu sırada "Yurdumuzun rəngləri”, "Rənglərin arzusu” ,"Yurdumuzu qarış -qarış gəzək” adlı tədbirləri, həmçinin milli qəhrəmanlara, eləcə də ölkəmizdə əlamətdar günlərlə bağlı olan anım günlərini, klub və mədəniyyət evlərinin hesabat konsertlərini misal çəkmək olar. N.Nərimanov adına mədəniyyət mərkəzində, Rəsm qalereyasında, mərkəzi kitabxanada və sair mədəniyyət ocaqlarında sözün əsl mənasında qızğın iş prosesi gedir. Musiqi məktəblərinin fəaliyyətində müsbət mənada dəyişikliklər var. Sumqayıt şəhər Mədəniyyət və Turizm idarəsinin fəaliyyəti göz qabağındadır. Bununla bağlı Xeberle.com portalında da az qala hər gün informasiyalar verilib.
"Mən həmişə teatra bağlı və yaxın olmuşam. Bu ötəri hiss deyil, içimdən gələn bir məhəbbətdir. Teatrı çox sevirəm. Teatra məhəbbət mənim içimdədir. İncəsənətin, o cümlədən kino və teatrın təsiri və tərbiyə qüvvəsi çox böyükdür. Bu qüvvədən bacarıqla istifadə etmək həmişə vacibdir.” Heydər Əliyev
Amma nəzərə alsaq ki, şəhərin mədəni mühitini, eləcə də mədəni, ictimai düşüncəni formalaşdıran, onu yönləndirən əsas sahələrdən biri olan teatrımız nədənsə son dövrlər geridə qalır. Bunun bir çox səbəbləri olub. O səbəblərdən biri təmirsizlik, avadanlıq çatışmazlığıdırsa, digər tərəfdən kollektivin yaradıcılıqda ciddi nöqsanların olmasıdır. Son illərdə teatrda hazırlanan tamaşalar, təəssüf ki, bu "məbəd”də yaradıcı mühitin olmasından xəbər vermir. Repertuara nəzər saldıqda hazırlanan tamaşaların əksəriyyəti kefiyyətsiz yazarlar tərəfindən təqdim olunmuş pyeslərdir. Əgər onlara pyes demək olarsa... Bu qəbildən olan "Xanışın toyu”, "Açarlarını itirənlər”, "Narkoman”, "Vicdanın hökmü” kimi əsərlər, görəsən, "hansı yolla” teatra ayaq açıb?!
Haqlı olaraq deyilə bilər ki, bizdə digər tanınmış yazıçıların pyesləri də səhnələşdirilib. Bəs yaxşı, "quruluş verilən bu tamaşalar hansı səviyyədədir?” deyəcəyimiz sual qarşısında nə cavab verilə bilər, bizə çox maraqlıdır. Teatr yaradıcı tərəflə yanaşı, idarəetmə, eləcə də reklam və PR işində də sovetlər dönəmində qalıb desək, yanılmarıq. Şəhərdə tamaşaların bir dənə də olsun afişasının olmaması buna bariz nümunədir. Ən acınacaqlısı isə teatrda kassanın olmaması və müasir dövrdə yaşamağımıza baxmayaraq internet saytının fəaliyyətinin dayndırılmasıdır. Maraqlıdır, görəsən, tamaşaçı azlığından şikayətçi olan teatr problemi özündə də axtarıbmı?! Yarım milyon əhalisi olan şəhərdə bir teatr ola və ora getməyə heç olmasa beş yüz adam tapılmaya?! Axı nə vaxta qədər Sumqayıt DRAM TEATRI uşaq tamaşaları hazırlamaqla baş qatacaq, bayram şənlikləri keçirəcək?! Nə vaxta qədər məktəblərə minnətçi düşəcək?! Həqiqətənmi çıxış yolu yoxdur?! Bax bu suallar ətrafında düşünməyə dəyər. Buna baxmayaraq, ümid edirik ki, şəhər rəhbərliyinin mədəniyyətə olan qayğısı bu məsələdə də özünü göstərəcək. Çünki mədəniyyətə, incəsənətə xidmət etmək hamımızın borcudur.
Ulu öndər Heydər Əliyev demişkən: "Xalq bir çox xüsusiyyətlərilə tanınır, sayılır və dünya xalqları içərisində fərqlənir. Bu xüsusiyyətlərdən ən yüksəyi, ən böyüyü mədəniyyətdir”.
Xeberle.com Mədəniyyət şöbəsi