Sumqayıt bu günlərdə özünün inkişaf dövrünü yaşayır. Şəhərdə kompleks işlər görülür. Sumqayıtda nəinki mərkəzi küçələr, hətta ən kənar, diqqətdən uzaq qalan ərazilər də abadlaşdırlır, yaşıllığa, gül-çiçəyə bürünür. Hazırda Sumqayıtda müxtəlif istiqamətlər üzrə bir sıra ərazilərdə intensiv işlər gedir. Gəlin bu iyun günündə onların bir qisminə nəzər yetirək.
Sumqayıt həmişə yaşıl şəhər olub. Statistikaya görə, Sumqayıtda adambaşına düşən yaşıllıq sahəsi ümumölkə göstəricisindən çoxdur və 26,5 kvadratmetr təşkil edir. Lakin son vaxtlarda onun ekologiyasına, yaşıllığına müəyyən zərbələr dəyib. Odur ki, şəhərin hakimiyyət orqanları bu rəqəmi 50 kvadratmetrə çatdırmaq niyyətindədirlər. Hazırda bu istiqamətdə müsbət dəyişikliklər aparılır, şəhərdə yaşıllıq yürüşləri davamlı xarakter daşıyır. Sumqayıtda yeni ağacların əkilməsi, qazonların salınması və onların sulanması, quru ağacların budanması adi hal alıb. Bu işləri şəhərin demək olar ki, hər bir yerində görmək olar. Sumqayıtda əkilən palmaların sayını artıq çətin ki, kimsə xatırlaya. Üstəlik, xan çinarı və zeytun kimi ağaclar da əkilməkdədir. Dekorativ kollar və çiçəklər isə artıq bütün mərkəzi küçələrdə, hətta kənar küçələrdə də əkilib. Bu şəhərdə əsl pozitiv ovqat, xoş təəssürat yaradır.

Sumqayıtda daim park və xiyabanlar abadlaşdırılır, hətta yeni parklar da salınır. Misal olaraq, vaxtilə qanunsuz, yöndəmsiz obyektlərlə zəbt olunan, hazırda isə onlardan təmzilənərək parka, yaşıllığa çevrilən "Nizami” kinoteatrının qarşısındakı park. May ayının əvvəlində bu ərazinin abadlaşdırılması başa çatdırlıb. Kinoteatrın qarşısına bütövlükdə tamet döşənib, skamyalar və zibil qutuları, həmçinin 5 ədəd yol boyu və 30 ədəd park daxili işıq dirəkləri qoyulub. Burada 10 minə qədər - betuniya, çobanyastığı, xrizantema və s. kimi müxtəlif növ güllər, min ədəd müxtəlif növ dekorativ kol və onlarla ağac, o cümlədən Kreml küknarı, palmalar əkilib. 1000 kv-metr əraziyə qazon döşənib. Ərazi bütövlükdə abadlaşdırılıb, ətraf binaların fasadı rənglənib. Yaxınlıqdakı ticarət obyektlərinin ətrafı da abadlaşdırılıb.

Sumqayıtda həllini gözləyən problemlərdən biri də məhəllədaxili yolların yararsız halda olması ilə bağlı idi. Şəhərin yol infrastrukturunun yenilənməsinin tərkib hissəsi olaraq 1, 3, 6, 9, 13, 17 və 18-ci mikrorayonlarında, 47, 48-ci məhəllələrində daxili yolların yenilənməsinə başlanıldı. Hazırda bu işlər sürətlə davam

etdirilir.

 Sumqayıt şəhərində lift təsərrüfatının yenidən qurulması ilə əlaqədar mühüm tədbirlər həyata keçirilir. 6, 9, 11, 10, 13 və digər mikrorayonlarda liftlər yenilənir, daha 60 lift quraşdırlır. 

Aparılan genişmiqyaslı abadlıq-quruculuq işlərinin əsas istiqamətlərindən biri də şəhərdaxili yolların genişləndirilməsi, təmiri və yenidən qurulması ilə bağlıdır. Nəqliyyatın intensiv hərəkəti üçün prospekt və küçələrin genişləndirilməsinə şəhərin girişindən başlanılıb. Bu işlər də intensiv şəkildə aparılır.
Hazırda Sumqayıtda Sülh küçəsində, şəhərin əsas giriş hissəsində yolun hər iki tərəfində park salınır. Salınan parklarda mövsümi güllərdən ibarət kompozisiya yaradılacaq. Ərazidə 500 palma və 500 çinar ağacı əkilməkdədir. Hər iki tərəfə ümumilikdə 5 min kv.metr qazon örtüyü salınır. Ümumiyyətlə şəhərin giriş hissəsinin siması bütovlükdə dəyişdiriləcək, bu şəhər rəhbərliyinin gördüyü işlərin sırasında prioritetlərdəndir.

Yeni rəhbərliyin ilk gündən diqqət yetirdiyi əsas məsələlərdən biri də məhz şəhərin dənizkənarı bulvarının yenidən qurulmasıdır. Hazırda dənizkənarı parkla birlikdə 186 hektar ərazini əhatə edən bulvarda işlər sürətlə həyata keçirilir. Sahil zolağı göz önündəcə günbəgün simasını dəyişir. Hazırda Xəzərin ləpədöyənində genişmiqyaslı tikinti və yaşıllaşdırma tədbirləri paralel aparılır. Layihədə gənclər şəhəri üçün böyük əhəmiyyət daşıyan bulvar ərazisinin daha da genişləndirilməsi nəzərdə tutulub. Ərazidə dənizə qarşı hündürlüyü 1 metr 60 santimetr, uzunluğu isə 4200 metr olan istinad divarı, demək olar ki, tikilib qurtarıb. Burada müasir tipli otellər, ticarət mərkəzi, kinoklub, uşaqlar üçün əyləncə məkanları, kafe, restoran və çoxmərtəbəli yaşayış binalarının tikintisi nəzərdə tutulur. Sumqayıtda tam təhküləsiz şəkildə velosiped idmanı ilə məşğul olmaq istəyənlər də yaxın zamanlarda bu arzularını reallaşdıra biləcəklər. Axı, Dənizkənarı Bulvar layihəsində velosiped həvəskarlarının istəkləri nəzərə alınıb: onlar üçün eni üç metr olan xüsusi hərəkət zolağı salınır. Bulvarda şəhər sakinlərinin piyada gəzintisi, kiçikölçülü gəzinti avtobusları və avtomobil yolu nəzərdə tutulur. Çimərlik zonasında da əsaslı işlər görüləcək. Sahil hissədə estakadalar qurulacaq və şəhərin akvatoriyasında gəzinti gəmilərinin hərəkəti təmin olunacaq.
Sevindirici haldır ki, Sumqayıtda növbəti Bayraq meydanının salınmasına başlanılıb. Belə ki, Sumqayıt Dənizkənarı bulvarında aparılan abadlıq-quruculuq işləri çərçivəsində ərazidə Bayraq meydanı da inşa edilir. Türkiyədən gətirilmiş 40 metr hündürlüyü olan bayraq artıq ərazidə quraşdırılıb. Bayrağın ətrafında isə fəvvarələr inşa olunur.

Məlimat üçün bildirək ki, Sumqayıtda ilk Bayraq meydanı şəhər İcra hakimiyyətinin qarşısında 2011-ci ildə salınıb.

 Heydər Əliyev Parkında, küçə və yaşayış ərazilərində kütləvi şəkildə ağaclar əkilir, yaşıllıqlar qayğı ilə əhatə olunur. Şəhər yaşıllaşdırma idarəsinin bağbanları daim yaşıllıq zolaqlarına qulluq edirlər. Bununla bərabər, ərazilərin yaşıllaşdırılması şəhər təsərrüfatının strukturları arasında bölüşdürülüb. Əkin yerlərinə su xətlərinin çəkilməsi, torpaqların hamarlanması, çalaların qazılması intensiv aparılır. İməciliklərə hər kəs həvəslə qoşulur. Ötən payız-yaz əkin mövsümündə Sumqayıtda 50 min həmişəyaşıl ağac əkilib. Son günlərdə həcmi daha da artıb. Belə ki, 100 min qızılgül kolu, 1,5 milyon mövsümi gül əkilib, 25 min kvadrat-rulon çəmənlik salınıb. Bundan başqa, yeni əkilmiş 600-ə yaxın yeni palma şəhərin küçə və bağlarına yaraşıq verir. Bir o qədər də dekorativ Hollandiya leylandrası ərazilərə köçürülüb. Əsas işlər şəhərin girişində, "Sülh” küçəsində, mərkəzi xiyabanlarda aparılır. Hazırda Koroğlu, Çerkassı küçələrində geniş iş cəbhəsi açılıb.Heydər Əliyevvə Lüdviqshafen parkları, ulu öndərin adını daşıyan prospekt, Azərbaycan, N.Nərimanov, S.Vurğun küçələri yeni yaşıllıqları, gülü-çiçəyi ilə baxanları heyran qoyur.

Onu da deyək ki, bu işlər yalnız şəhərdə deyil, Sumqayıtın qəsəbələrində də geniş vüsət alıb. Belə ki, 7,5 kilometr uzunluğu olan Sahil küçəsinin – Novxanı yolunun genişləndirilməsi prosesi hazırda uğurla davam edir. Yolun qədim yaşayış məskənlərindən sayılan Corat qəsəbəsindən keçən hissəsində sakinlərin istirahəti məqsədilə də işlər həyata keçirilir.

Son aylarda şəhər icra başçısının apardığı tikinti-abadlıq işləri biznes mühitini şəhərdə yeni biznes açmaq istəyənlər üçün son dərəcə cazibədar edir. Bütün bu inkişafın fonunda təbii ki, Sumqayıtda iş yerlərinin artması və şəhərə investisiyanın axını qaçılmazdır. Məsələn hazırda şəhərimizdə bir çox müəssisələr, o cümlədən "Karbamid” zavodu tikilməkdədir. Layihə çərçivəsində tikinti işlərinə 1800 nəfər cəlb olunub ki, onların 80%-i Sumqayıt sakinləridir. Gözlənilir ki, pik vaxtında zavodda 2500-3000 nəfər çalışacaq. Bundan başqa enerji və buxar istehsalı sahəsində fəaliyyət göstərəcək birgə müəssisənin - "SOCAR-Uniper" MMC-nin yaradılması da planlaşdırılıb. Artıq Sumqayıtda SOCAR və Almaniyanın "Uniper" şirkəti arasında bu haqda saziş imzalanıb. Bu siyahını uzatmaq da olar.
Artıq şəhərin istilik təchizatı məsələrinə də geniş diqqət ayrılmaqdadır. Bununla bağlı Sumqayıtın 17 və 18-ci mikrorayonlarında yeni qazanxanaların inşasına başlanılıb. Bunun davamı olaraq işlərin 13 və 10-cu mikrorayonlarda aparılması güman edilir. Planlaşdırılır ki, yaxın 2 ildə Sumqayıtda istilik təchizatı problemi sakinlərə birdəfəlik unutdurulsun.
Daha bir diqqətçəkən məqam kanalizasiya və binaların zirzəmilərində yığılan sularla bağlıdır. Hazırda Sumqayıtın bir neçə nöqtəsində yaşayış binalarının zirzəmiləri çirkab sulardan qurudulur, yeni kanalizasiya xətləri çəkilir. Maraqlısı odur ki, bu işlər hər zaman şəhərin görünən hissələrində aparılsa da, uzaq mikrorayon və məhəllələrdə bu tip işlər aparılmırdı. Bütün şəhər üzrə bina və zirzəmilərdə bu tip işlərin aparılması alqışalayiqdir. Düzdür, xırda problemlər olsa da, bu problemlərin həllinə ümid daha böyükdür. Çünki hiss olunur ki şəhər icra hakimiyyəti və aidiyyəti qurumlar bu problemləri aradan qaldırmağa maraqlıdır.

 

Sübh saatlarından həyətlərin süpürülməsi, bardürlərin rənglənməsi isə hər kəsin ürəyincədir. Sumqayıtda sanki həftənin bütün günlərində iməcilik işləri aparılır.

Bütün bu işlər şəhər sakinlərinin prezidentə yazdığı məktublarda da böyük razılıqla öz əksini tapır. Prezidentin rəsmi saytında yerləşdirilmiş məktublarda Prezident İlham Əliyevin Sumqayıta olan diqqət və qayğısından, şəhərimizin gündən-günə gözəlləşməsindən, şəhərdə həyata keçirilən abadlıq-quruculuq işlərindən razılıq ifadə olunur. Maraq üçün may ayı ərzində Sumqayıt şəhər sakinlərinin Prezident İlham Əliyevə yazdığı məktublardan bir neçəsinin mətnini təqdim edirik:

Vaqif Qəhrəmanovdan:

Çox hörmətli cənab Prezident.

Respublikamızın bütün bölgələrində olduğu kimi, Sumqayıt şəhərində də geniş abadlıq-quruculuq işləri aparılır. Şəhərin girişindəki yolda və dənizkənarı parkda görülən işlər, məhəllə və mikrorayonlarda daxili yolların asfaltlanması, binaların dam örtüklərinin əvəzlənməsi və fasadlarının təmir edilməsi, yol kənarlarına və parklara gül kollarının əkilməsi şəhərimizə xüsusi görkəm verir. Biz bütün bunları Sizin Sumqayıta olan diqqətinizin nəticəsi kimi qiymətləndiririk.

Çox hörmətli Prezident, bütün bunlara görə şəhərimizin tibb işçiləri adından Sizə dərin minnətdarlığımızı və təşəkkürümüzü bildiririk.

Heybətulla Əhmədxanovdan və başqalarından:

Hörmətli cənab Prezident.

Sumqayıt şəhərinə göstərdiyiniz diqqət və qayğıya görə Sizə minnətdarıq. Şəhərimizin girişindən tutmuş daxiliməhəllələrinə kimi hər yerində görülən abadlıq-quruculuq işləri bütün sakinləri sevindirir. Dənizkənarı bulvarın müasir üslubda yenidən qurulması bu işlərə əlavə rəng qatır. Bulvarın istifadə veriləcəyi günü çox böyük səbirsizliklə gözləyirik.

Əziz Prezidentimiz, bu işlərin yerinə yetirilməsinə göstərdiyiniz qayğıya görə Sizə bir daha təşəkkür edir, gələcəkişlərinizdə uğurlar arzulayırıq.

 

Bir sözlə, aparılan işlərə, reallaşdırılan layihələrə görə, Sumqayıt günü-gündən gözəlləşir, abadlaşır. Xüsusən Prezident İlham Əliyevin qayğı və diqqəti sayəsində Sumqayıt şəhəri nəinki Azərbaycanın, bütövlükdə regionun müasir sənaye və turizm mərkəzinə çevrilir. Haçansa Sumqayıtı Batumi, Kabuleti, Soçi kimi turizm şəhərlərinin cərgəsində görənlər, sözsüz ki, çətin bu yazının sonundakı son cümlələri xatırlaya...
Xeberle.com

 

 

 

 

 

 

 

 

 

 

 

 

 

 

 

 

 

 

 

 

Xəbərdən istifadə edərkən istinad etmək vacibdir.