Sumqayıt şəhər İcra Hakimiyyətində cari ilin 6 ayının yekunları və qarşıda duran vəzifələrlə bağlı hesabat yığıncağı keçirilib.

Xeberle.com məlumat verir ki, tədbirdə çıxış edən Sumqayıt Şəhər İcra Hakimiyyətinin başçısı Zakir Fərəcov ötən müddət ərzində Sumqayıtda sosial-iqtisadi sahədə surətli inkişafdan danışıb. Z.Fərəcov şəhərdə aparılan abadlıq-quruculuq işlərindən və şəhərin simasının sürətlə dəyişdiyindən söhbət açıb. İcra başçısı çıxışında nailiyyətlərlə yanaşı, bir sıra sahədə, o cümlədən səhiyyə, təhsil sahəsində olan nöqsanlara da toxunub. O, doğum evlərində hələ də neqativ halların müşahidə olunduğunu qeyd edib və Sumqayıt Səhiyyə şöbəsinin müdiri Ələkbər Tağıyevə xəbərdarlıq edib. Bununla yanaşı, şəhər rəhbəri təhsil sahəsində də çatışmazlıqların olduğunu vurğulayıb. Bildirib ki, orta məktəblərdə nizam-intizam aşağı səviyyədədir və Təhsil şöbəsinin müdiri Ruhiyyə Tağıyevaya bu kimi halların aradan qaldırılması ilə bağlı göstərişlərini verib. O, Sumqayıt şəhər Mənzil Kommunal Təsərrfüatı İstehsalat Birliyinin fəaliyyətini də tənqid edib. Qeyd olunub ki, şəhərdə təmizlik işləri istənilən səviyyədə aparılmır, zibil qutuları vaxtında daşınmır. Həmçinin şəhər ərazisində zibil qutuları çatışmır.

Şəhər rəhbəri bu kimi problemlərin həlli üçün Sumqayıt Mənzil Kommunal Təsərrfüatı İstehsalat Birliyinin rəisi Rahim Mustafayevə tapşırıqlarını verib.