- Çox sağ olun. Mən Elgün Cəfərov 1999-cu ildə Sumqayıt şəhərində anadan olmuşam. Ailədə beş nəfərik. Mən, qardaşım, anam, atam və nənəm. Atam STP-də işləyir, anam orta məktəbdə ingilis dili müəlliməsidir. İbtidai sinifi 35 saylı orta məktəbdə oxumuşam. 17-ci mkr-da yaşayıram. 6-cı sinifdən Texniki Təbiət Elmləri liseyində oxuyuram. 10 və 11-ci siniflərdə "Hədəf” kurslarında hazırlıq keçmişəm. Təhsil aldığım hər üç təhsil ocağında müəllimlərimə öz dərin minnətdarlığımı bildirirəm.

- Hansı ali məktəbdə oxumaq istərdin? Artıq seçimini müəyyənləşdirmisənmi?

- Əslində, hələ tam qərar verməmişəm. Amma 2-3 seçim qarşısındayam. Bunlardan biri Prezident yanında Dövlət İdarəetmə Akademiyasında hüquqşünaslıq fakültəsi, o biri Ali Diplomatiya Akademiyasında dövlət və ictimai münasibətlər fakültəsi, digəri isə Azərbaycan Dillər Universitetində sinxron tərcümə fakültəsidir.

-Sənədlərini 3-cü qrup ixtisasları üzrə vermək istəyi haradan yarandı?

- Əvvəlcə söyləyim ki, tarix ən çox sevdiyim fəndir. Ümumiyyətlə humanitar fənlərə marağım çox yüksəkdir.

- Hazırlıq prosesi necə gedirdi? Son dövrlər gənclərin ən çox vaxtını aparan internet və digər əyləncə sahələridir. Bu baxımdan çətin olmadı ki?

- Sözün açığı, 10-cu sinifdə hazırlığım rahat oldu. Çünki hazırlıq prosesi 11-ci siniflərlə birlikdə aparılırdı. Həm də elə 11-ci sinifə təzə başlayanda demək olar ki, hər şeydən təcrid olundum. Hətta evdə bütün kompüterlərə kod qoyuldu. Özüm də söz vermişdim ki, valideynlərimivə təhsil aldığım məktəbi yüksək balla sevindirəcəm. Ailəm sağ olsun, mənə hər zaman dəstək oldular.

- Ailə demişkən, valideyinlərinlə sənin istəyin üst-üstə düşürdümü, yoxsa onlar sənədlərini başqa qrupa verməyi tövsiyə edirdilər?

- Bu yöndə bəxtim gətirib. Valideynlərim mənim seçimimə hörmətlə yanaşırdılar. Bəzi valideynlər var ki, məcburən övladlarını özləri istədikləri sahəyə yönəldirlər, hətta təzyiq göstərirlər. Bizdə amma heç bir məhdudiyyət qoyulmadı. Hətta hazırlıq vaxtı onları gec-gec görürdüm. Bütün günü otağımda hazırlaşırdım. Gec-gec ünsiyyətə girirdim.

- Özünün proqnozun nə idi, hansı nəticəni gözləyirdin?

- "General olmağı düşünməyən əsgər çavuş ola bilməz”. Təbii, mən özüm 700 bal gözləyirdim. Amma 696 bal mənim üçün heç də faciə deyil. Hamı məndən 700 bal gözləyirdi. Naşükürlük olmasın,imtahandan çıxan kimi nəticəni yoxlatdırdım. Biləndə ki, bir səhv etmişəm çox pis oldum. Atama zəng etdim və 696 bal topladığımı söylədim. Atam mənə dedi ki, canın sağ olsun.

- Xaricdə təhsillə bağlı nə fikirləşirsən?

- Bildiyimiz kimi,2015-ci ilə kimi Xaricdə təhsil dövlət təminatı ilə həyata keçirilirdi. Amma bu il ləğv olunduğu üçün bu imkandan yararlana bilmədim. Amma bakalavr pilləsini başa vurduqdan sonra magistraturaya xaricdə qəbul olunmaq istəyirəm.

- Uşaq vaxtı ən çox verilən sual "Kim olmaq istəyirsən”dir. Sənə bu sualı verəndə nə cavab verirdin?

- Uşaqların bu suala ən çox cavab verdiyi sahə polisdir. Mən də belə fikirləşirdim. Daha sonra həkim olmaq istədim. Amma yaşım artdıqca anladım ki, bu sahə mənlik deyil və humanitar sahəni seçdim.

- Təhsildən başqa marağın nəyədir?

- Ən çox futboldur. Futbola baxmaqdan çox oynamağı sevirəm. Düzdür, yaxşı oynaya da bilmirəm (gülür). Nəticələr bəlli olan kimi düşdüm həyətə futbol oynayıb stress atdım. Azarkeşlik etdiyim klublar "Barselona” Azərbaycanda isə "Qarabağ”dır. Futboldan əlavə isə 9-cu sinifə qədər rəsm çəkməyi çox sevmişəm.

- Sumqayıtla bağlı fikirlərin nədir? Şəhərimizdə nəyi başqa cür görmək istəyərdin?

- Sumqayıtda əvvələ baxanda son dövrlərdə yenidənqurma işləri artıb. Müxtəlif təyinatlı obyektlər tikilir. Şəhər sakini kimi çox istərdim ki, Sumqayıtda yüksək səviyyəli ali məktəb olsun. Düzdür, Sumqayıt Dövlət Universiteti var. Amma çox heyf ki, tələbələrin ən az bal toplayanı, ən son seçdikləri ali məktəb buradır. Ümid edək ki, gələcəkdə şəhərimizdə ölkənin ən güclü universiteti olacaq.

Sonda Elgün Cəfərov onagöstərilən diqqətə görə minnətdarlığını bildirdi.
Söhbət etdi: Kamal Almuradlı
Xeberle.com