Bildiyimiz kimi, 2 aya yaxın bir müddətdir, Sumqayıt şəhərinin ekoloj vəziyyəti heç də ürəkaçan deyil. Mütəmadi olaraq Sumqayıt şəhər Təmizlik Departamentinin balansında olan Məişət Tullantıları Poliqonunda məişət tullantılarının yandırılması nəticəsində atmosferə qatı tüstü və zəhərli qazlar daxil olur. Poliqon şəhərin girişində yerləşdiyi üçün zəhərli hava, üfunət qoxusu Sumqayıtı bürüyür. Xüsusən yay aylarında - axşam saatlarında sakinlərin daha çox park və xiyabanlarda istirahət etdiyi zaman bu qoxu və tüstü onların haqlı narazılığına səbəb olur. Atmosferdə zəhərli qazların qoxusu şəhərin mərkəzi məhəllə və mikrorayonlarında xüsusilə duyulur. Bir sıra sumqayıtlının sözünə görə onlar hətta havanın yuxarı olan hərarətinə baxmayaraq sözügedən qoxuya görə pəncərələrini aça bilmirlər. 

 

Ötən əsrin 80-ci illərində salınan bu poliqon heç bir müasir tələblərə cavab vermir. Ərazi hasarlanmayıb, giriş çıxış hissələrdən şlaqbaumlar qoyulmayıb, poliqona kənar şəxslərin girişinə nəzarət olunmur. Ən böyük problem isə sutka ərzində Sumqayıt şəhərindən əraziyə daxil olan məişət tullantıları mövcud qaydalara uyğun idarə olunmamasındadır. Çünki xüsusi avtomobilləri ilə poliqona daşınan tullantılar basdırılmır, üzəri torpaqlanmır. Əvəzində isə təəssüf ki, YANDIRILIR. Bu isə atmosferə xüsusən insan orqanizminə çox zərərlidir. Mütəxəssislərin fikrincə bu zəhərli qazlar uşaq və körpələrə daha çox zərər verə bilər. Bu problem insanda xərçəng başda olmaqla bir çox təhlükəli xəstəliklər yarada bilər.
Maraqlıdır ki, poliqona məsul şəxslər isə bildirirlər ki, zibil onlar tərəfindən yandırılmır. Ya kənar şəxslər bunu edir, ya da ərazi öz özünə alışır. Hər halda əgər məsuliyyəti şəhər Təmizlik Departamenti daşıyırsa, onlar burada hansısa yanğının baş verməməsinə nəzarət etməlidirlər. Hətta buna görə son 2 ildə Ekologiya və Təbii Sərvətlər Nazirliyi tərəfindən Təmizlik Departamenti 27500 manat məbləğində cərimə olunub. Buna baxmayaraq, Sumqayıtda ekoloji genosid hələ də davam edir....
Yaxşı anlayırıq ki, hər gün poliqonda zibilin basdırılması, bərkitmə işlərinin aparılması müəyyən xərc tələb edir. Hər halda bu məsrəflər ümid edirik ki, Sumqayıt sakinlərinin ilk növbədə sağlamlığından, sonra da istirahətindən yuxarıda dayanmır.
Son günlər ərazidə məişət tullantılarının utilizasiyası zavodunun tikiləcəyi ilə bağlı söz söhbətlər var. Lakin indiki şəraitdə tikinti smetası təxminən 40-50 milyon manat civarında hesablanan bu müəssisənin qurulması real görünmür. Yaxud hətta buna qərar verilərsə, zavodun tikilib qurtarıb fəaliyyətə başlaması azı 2 il davam edəcək. Və deməli bu müddətdə Sumqayıt sakinləri bu havada yaşamağa çalışmağa dincəlməyə gəzməyə məhkumdurlar..?! Hər halda Sumqayıt şəhər İcra Hakimiyyətinin başçısı Zakir Fərəcov şəhərdə genişmiqyaslı abadlıq-quruculuq işləri apardığından, onun Bakı standartlarına çatdırılmasını arzu edən bir şəxs kimi problemdən məlumatlıdır. Onun Sumqayıtı müasir tipli turizm şəhərinə çevirmək istəyən, üstəlik, bir sıra məsələlərə fəal, təcili şəkildə münasibət bildirdiyini nəzərə alsaq, ümidvarıq ki, problem də tezliklə aradan qalxacaq. Müvəqqəti çıxış yolu var. Məişət tullantılarının müqavilə əsasında Balaxanı zavoduna daşınması variantı mövcuddur. Yaxud da elə qaydalara uyğun şəkildə poliqona qazılaraq basdırılması yolu. Bunlar baş verməyəcəyi təqdirdə zibil yandırılan günlərdə Sumqayıtda əleyhqazla gəzmək tövsiyə olunur. Necə ki, bunu Xeberle.com portalının əməkdaşları nümunə olaraq göstərib. Zəhərli havaya etiraz olaraq fotosessiya edib: "Bəs sənin əleyhqazla Sumqayıtda şəklin varmı?!”
Sumqayıtlılara aydın səma, təmiz hava və gül qoxulu günlər arzu edirik.

Xəbərdən istifadə edərkən istinad etmək vacibdir.