Hazırda Sumqayıt şəhərindəki bir sıra ümumtəhsil məktəbinin
direktoru yoxdur. Bu təhsil müəssisələrinə
rəhbərlik edən şəxslər müxtəlif səbəblərdən vəzifələrindən uzaqlaşdırılıblar.
Xeberle.com bununla bağlı kiçik araşdırma aparıb.
Araşdırma nəticəsində 9 orta ümumtəhsil məktəbinin direktor postuna rəsmi təyinatın olmadığı üzə çıxıb. Yeni dərs
ilinin başlanmasına rəğmən, hələ də həmin məktəblər direktorsuz qalıb.
Məsələn, İ.Qayıbov adına 1 nömrəli orta məktəbin
direktoru Fəyyaz Məmmədov bu yaxınlarda tutduğu vəzifədən
uzaqlaşdırılıb. Direktor postuna yeni təyinat olmayıb. 2009 və 2014-cü illərdə "Ən yaxşı ümumi təhsil müəssisəsi"
müsabiqəsinin qalibi olan məktəbdə direktor vəzifəsini müavin Təranə İsgəndərova icra edir.
Şəhərin 17-ci mikrorayonunda yerləşən 4 nömrəli məktəbdə
də eyni vəziyyət hökm sürür. Artıq 1 ilə
yaxındır ki, bu məktəbdə direktorun səlahiyyətlərini icra etmək müavinə
tapşırılıb. Bu məktəbin direktoru olmuş Teymur Səmədov isə hazırda
Sumqayıt şəhər İcra Hakimiyyəti başçısının müavinidir.
Sumqayıtın ən yaxşı məktəblərindən hesab edilən və 2014-cü ildə "Ən yaxşı ümumtəhsil
məktəbi" müsabiqəsinin qalibi olan 11 nömrəli orta məktəbin də direktor
postuna rəsmi təyinat olmayıb. Belə ki, uzun illər bu təhsil müəssisənin
uğurları üçün çalışmış "Əməkdar müəllim” və "Şöhrət” ordeni laureatlı Ofelya Babayeva ötən ilin dekabr ayında 18 il
rəhbərlik etdiyi təhsil ocağının direktoru vəzifəsindən yaş senzinə görə
çıxarılıb. Hazırda isə direktor əvəzi Şəhla Bağırovadır.
2012-ci ildə "Ən yaxşı ümumi təhsil müəssisəsi"
müsabiqəsinin qalibi olan Məhəmməd Füzuli adına 15 nömrəli tam orta məktəbin 20
ilə yaxın direktoru işləmiş Xanəli Məmmədov də bu yaxınlarda tutduğu vəzifədən
uzaqlaşdırıldı. Sözügedən məktəbdə də direktor vəzifəsini müavin icra edir.
Bu ilin fevral ayından Zülfü Hacıyev adına 17 nömrəli
tam orta məktəbin də direktor əvəzi vəzifəsində
çalışan Mehriban Nəcəfova da bu posta təsdiq olunmayıb. M.Nəcəfova 2013-cü ilin
noyabr ayına qədər isə 24 nömrəli məktəbin direktoru vəzifəsində çalışıb.
Elə bu tarixdən 2012-ci ildə "Ən yaxşı ümumi təhsil
müəssisəsi" müsabiqəsinin qalibi olan 24 nömrəli məktəb direktorsuz qalsa
da, hazırda Sumqayıt Təhsil şöbəsinin müdiri vəzifəsində çalışan Ruhiyyə Tağıyeva bir müddət bu məktəbə rəhbərlik edib. Hazırda isə bu vəzifəni Tamilla Vəliyeva əvəz edir.
2011-ci ildə "Ən yaxşı ümumtəhsil müəssisəsi"
müsabiqəsinin qalibi olmuş 27 nömrəli məktəbin direktoru vəzifəsində işləmiş
Əlifxan Məmmədov isə ötən ilin dekabr ayında
yaş senzinə görə vəzifəsindən azad olunub. Bu məktəbdə direktor vəzifəsini
hazırda Valid Mustafayev icra edir.
Hələ də direktor təyin olunmayan digər məktəblərdən
biri də 40 nömrəli məktəbdir. Sözügedən
məktəbin direktoru Ofelya Quliyeva ötən ilin dekabr ayında yaş senzinə
görə işdən azad olunub. Bu təhsil ocağında direktor əvəzi isə Təranə
Əmirovadır.
Və nəhayət Sumqayıtın ən yaxşı təhsil
müəsissələrindən biri sayılan "Təfəkkür” liseyi də başsız qalıb. Belə
ki, ötən ilin dekabr ayında uzun müddət liseyin uğurları üçün çalışmış direktor Bəsirə Ağayeva yaş senizə görə vəzifəsi
ilə vidalaşmalı olub. Hazırda direktor vəzifəsini Pərviz Əliyev icra edir.
Maraqlıdır ki, Sumqayıtın özündə yetişmiş yüzlərlə,
minlərlə bacarıqlı kadr var. Heç də təsadüfi
deyil ki, Sumqayıtı respublika üçün kadrlar hazırlayan laboratoriya da
adlandırırlar. Sumqayıtda müxtəlif vəzifələrdə işləyərək böyük təcrübə əldə
etmiş neçə-neçə yüksək ixtisaslı mütəxəssis respublika səviyyəsində vəzifələrdə
işləməyə irəli çəkiliblər. Bununla yanaşı, Sumqayıt təhsilində, eləcə də ölkə təhsilinin
inkişafına daim səy göstərən kadrlar az deyil. Belə olan təqdirdə bəs niyə
sözügedən məktəblərə gənc, savadlı və gələcək perspektivləri olan şəxslər
direktor təyin olunmurlar?
Uzağa getməyək,
bu yaxınlarda Sumqayıtdan paytaxta
''beyin axını'' davam etdiyinin bir daha şahidi olduq. Belə ki, Sumqayıt şəhər
Təhsil Şöbəsinin Ekoloji Tərbiyə və Təcrübəçilik Mərkəzinin direktoru
Emilya Səfərəliyeva Bakı şəhər Nərimanov
rayonu Novruzov qardaşları adına 36 №-li orta ümumtəhsil məktəbin, Sumqayıt şəhər
39 nömrəli məktəbin təşkilatçısı Məhəbbət Əsgərova Bakı şəhəri Yasamal rayonu
176 saylı tam orta məktəbin, Sumqayıt şəhər 31 nömrəli orta məktəbin
informatika müəllimi Nailə Cəfərova isə Bakı şəhər Binəqədi rayonu 297 saylı
tam orta məktəbin direktoru vəzifəsinə təyin olundular.
Yeri gəlmişkən,
15 il Sumqayıt şəhər təhsil şöbəsinin müdiri işləmiş Vidadi
Bağırov bu yaxınlarda Təhsil Nazirliyinin təhsilin inkişafı proqramları şöbəsində
sektor müdiri təyin edilib.
Beləcə
Sumqayıtın perspektivli kadrları şəhərdən uzaqlaşırlar.
Sumqayıtın təhsil cəhətdən heç bəxti gətirməyib, desək
yanılmarıq. Yadınızdadırsa, neçə illər Sumqayıt Şəhər Təhsil Şöbəsinə müdir təyin
olunmadı. Belə olan təqdirdə yada Mayn Ridin "Başsız atlı” romanı düşür.
Sıldırım qayalarla hürkərək hara gəldi qaçan, küləkdə və yağışda özünü və tərkindəki sahibini qorumağa çalışan
başsiz atlı...
Bəli, başsız qalıb öz əzmkarlığını qoruyub saxlayan
müəllimlərimiz kimi. Görəsən, Təhsil nazirimiz Mikayıl Cabbarov cənabları
Bakının bir addımlığında yerləşən Sumqayıt şəhərinə elə öz sumqayıtlılarımızın
içindən layiqli direktor namizədləri tapa bilmirmi?
Ümid edək ki, bu direktor məsələsi müdir vəzifəsi
kimi uzanmayacaq və yaxın zamanlarda öz
həllini tapacaq. Hər halda bunun səbəbi kadr çatışmazlığı deyil, başqa bir səbəbdir.
Ramil Zeynallı
Xeberle.com
Xəbərdən istifadə edərkən istinad etmək vacibdir.
