Sumqayıtda fəaliyyət göstərən Next Tuition Centre-in təşkil etdiyi "Ümummilli lider Heydər Əliyevin əziz xatirəsinə həsr olunmuş” məktəblərarası milli intellektual "Xəmsə” oyunu başa çatıb. Yarışda 3 məktəbdən 12 komanda iştirak edib. Oyunun 1\4 mərhələsi növbəli olaraq 1 aydan artıq idi ki, həftəsonları məktəblərdə və Next Tuition Centre-də keçirilirdi.

Komandalar arasında davam edən gərgin mübarizədən sonra Sumqayıt şəhəri 11 nömrəli, Sumqayıt şəhəri 3 nömrəli, Füzuli rayon 7 saylı məktəblərindən cəmi 7 komanda yarımfinala vəsiqə qazanıb. Yarımfinal və final mərhələləri Next Tuition Centre və Sumqayıt şəhər Mədəniyyət və Turizm İdarəsinin birgə əməkdaşlığı çərçivəsində Heydər Əliyev Mərkəzində təşkil olunub. Himnimizin səsləndirilməsindən sonra turniri ön sözlə Next Tuition Centre-in baş direktoru Kamran Məmmədov açıb. Ardınca Sumqayıt şəhər Mədəniyyət və Turizm İdarəsinin rəisi Mehman Şükürov, habelə Sumqayıt şəhər Təhsil Şöbəsinin əməkdaşı Salam İsmayılzadə çıxış edib. Sonra yarışlara start verilib. Sumqayıt şəhər 11 nömrəli məktəbin " Penta” və "Hard-working” , 3 nömrəli məktəbin "Xəzər” və "Odlar Yurdu” , Füzuli rayonunun 7 saylı məktəbinin isə "Qarabağ” və "Füzuli” komandaları, Sumqayıt məktəblilərinin həvəskar "Sülh” komandası yarımfinalda mübarizə aparıblar. Finalda isə " Penta” ,"Hard-working”,”Odlar Yurdu” və "Qarabağ” komandaları yarışdılar. Nəticədə Sumqayıt şəhəri 11 saylı məktəbin "Hard-Working” komandası birinciliyin qalibi oldu. Müvafiq olaraq, "Penta” və "Qarabağ” komandaları II və III yerləri bölüşüblər. Turnirin sonunda şəhər rəsmiləri tərəfindən qaliblər kubok və sertifikatlarla təltif edildi, onlarla xatirə şəkilləri çəkildi. Təşkilatı dəstək üçün "Sumqayıt İntellektual Oyunlar” klubundan Seymur Salamov və Vüqar Ağayevə xüsusi təşəkkürlər bildirilir. Mövzu və sualların məktəblilərin bilik səviyyəsinin artırılmasına yönəlməsi məktəb direktorları və müəllimlərin, bütün iştirakçıların və eyni zamanda yarışa azarkeşlik edənlərin rəğbətini qazandı.
Xeberle.com