- Belə əməliyyatlar bizim köhnə, klassik üsul vasitəsilə etdiyimiz əməliyyatlardan fərqlənir. Klassik üsulda əməliyyat kəsik, narkoz vasitəsilə aparıldığından xəstə üç gün və ya bir həftə ərzində xəstəxanada qalırdı. Hazırda etdiyimiz əməliyyat endovenoz lazer ablasiyası adlanır və el arasında bu, lazer əməliyyatı kimi tanınır. Bu əməliyyat zamanı biz birbaşa damarın içərisinə daxil olaraq varikoz olan nahiyyədə lazer vasitəsilə işləyirik. Bunu heç bir kəsik aparmadan edirik və əməliyyatdan sonra ayaqda estetik olaraq  gözlə görünən heç bir iz olmur, əməliyyat olunduğunu yalnız dopler vasitəsilə görmək mümkün olur. Əməliyyatdan 1-2 saat sonra xəstə evə buraxılır və ona 1 ay müddətinə xüsusi varikoz corabları geyindirilir.  Lazer əməliyyatı olunan şəxs növbəti gün normal iş fəaliyyətinə davam edə bilər. İri damarları lazer əməliyyatı vasitəsilə, xırda damarları isə biz skleroterapiya vasitəsilə əməliyyat edirik. Bu zaman xüsusi maddəni köpük formasında birbaşa damarın daxilinə yeridirik və həmin köpük bir müddətdən sonra narahatlıq yaradan damarların sorularaq yoxa çıxmasına səbəb olur. Bu prosedur zamanı xırda damarlar tez, iri damarlar isə bir az gec sorulur. Əgər ayağında olan xırda damarları özünə kompleks edən  xanımlarımız varsa mən onlara skleroterapiyanı məsləhət görərdim.

- Xəstəliyin daha çox qadınlarda yaranmasının əsas səbəbi onların hamiləlik dövrü keçirmələridir. Çox vaxt qadınlar hamiləlik zamanı lazım olan prosedurlara riayət etmirlər. Bu dövrdə qadınlar hamiləliklərinin 3-cü ayından başlayaraq  bitənə qədər varikoz corablarından istifadə etməlidirlər. Əgər qadınların genetikası normaldırsa, hamiləlikdən sonra damarlar kiçilir, lakin damarların divarından zəiflik varsa, ola bilər ki, damarlar tam olaraq kiçilməsin və varikoz xəstəliyi kimi formalaşsın.

- Genetikasında varikoz xəstəliyi olan şəxsləri valideynləri mütəmadi olaraq nəzarətdə saxlamalı və onları yetkinlik yaşlarına çatanda dopler müayinəsindən keçirməlidirlər. Əgər həmin şəxslərdə varikoz xəstəliyinə meyillilik varsa, onların ildə bir dəfə dopler müayinəsindən keçməyi tövsiyə olunur və profilaktik olaraq xüsusi dərmanlar var ki, biz bu dərmanları onlara ildə iki dəfə, bir aydan və ya iki aydan bir içməyi məsləhət görürük. Bundan başqa, valideynlər övladlarının qidalanmasına xüsusi nəzarət etməli və onlarda artıq çəkinin yaranmasına qarşı tədbirlər görməlidirlər. Çünki bir insanda artıq çəki varsa, bu həmin şəxsin  varikoz xəstəliyinə tutulma ehtimalının daha çox olması deməkdir.