Məlumdur ki, 2018/2019-cu tədris ili üçün ali təhsil müəssisələrinin və AMEA-nın magistraturalarına ixtisaslaşma seçimi artıq başlayıb. İyunun 8-dən 18-nə kimi davam edəcək seçim prosesi ərzində bakalavrlarda ən çox narahatlıq doğuran ixtisas seçimini necə edim məsələsidir. Dövlət İmtahan Mərkəzi (DİM) tərəfindən seçim etmək üçün bakalvrlarda fikir formalaşdıra biləcək xüsusi vəsaitin çap olunmaması bu narahatlığı daha da artırır. Məsələ barədə Xeberle.com-a açıqlama verən təhsil eksperti Kamran Əsədov  bildirdi ki, vəsaitin çap olunması özəl ali təhsil müəssisələrində plan yerlərinin boş qalması ilə nəticələnə bilər:

 

"Bilirsiniz ki, artıq 1992-ci ildən bakalavr pilləsinə, 2006-cı ildən etibarən isə ali məktəblərin magistratura pilləsinə qəbul test imtahanı yolu ilə həyata keçirilir.  Bakalavr pilləsinə qəbul olan şəxslər DİM-in (əvvəlki Tələbə Qəbulu üzrə Dövlət Komissiyası (TQDK) nəşr etdiyi kitabçalardan istifadə edərək seçim prosesində iştirak etdikləri üçün neçə bal intervalı toplayan abituriyentlər haqda məlumatlı idilər. Amma nəzərə alsaq ki, ali məktəblərin bakalavr pilləsinə qəbul üçün dörd ixtisas qrupu var və bu ixtisaslar onun daxilindədir, ümumilikdə ixtisas qruplarına sənəd verənlərin sayı 20 mindən 30 minə qədər dəyişir. Ona görə də bu bal intervalının hesablanması qəbul zamanı ciddi təsir göstərir. Hazırda DİM tərəfindən belə bir vəsaitin çap olunmasına ehtiyac yoxdur. Ona görə ki, ali məktəblərin magistratura pilləsinə qəbul olmaq üçün sənəd verən abituriyentlərin sayı birinci mərhələdə cəmi 12 min nəfər idi və onların 8 mini ikinci tura vəsiqə qazanıb. Plan yerlərinin sayı isə 9 minə yaxındır. Bu o deməkdir ki, şərtlərə əsasən keçid balını toplayan hər kəs qəbul olunmaq hüququna malikdir. Həmçinin bakalavr pilləsində 4 ixtisas qrupu olduğu halda, magistraturada 56 ixtisas var və o qədər bakalavr yoxdur ki, DİM bu ixtisasların hər biri üzrə toplanan balları nəşr etdirsin. Bu həm də ciddi şəkildə digər plan yerlərinin boş qalması ilə nəticələnə bilər. Bakalavrlara ixtisas seçimi üçün kifayət qədər yer verilib, yəni 10-a qədər plan yeri doldura bilərlər. Amma bu ixtisaslara ötən il neçə bal ilə qəbul olunduğu göstərilsə, onda özəl ali təhsil müəssisələri boş qalar. Hamı birmənalı olaraq dövlət ali təhsil müəssisələrini seçər. Ona görə də gizliliyin qorunmasını müəyyən qədər universitetlərə güzəşt kimi də başa düşmək olar. Lakin bakalavrlar ötən ilki jurnal vasitəsilə bunu edə bilirlər. Yəni keçən il formalaşan bal ilə bu ilki arasında elə də ciddi bir fərq olmayacaq. Təsəvvür edin ki, bakalavrlar 200-700 intervalı arasında bal toplayanların statistikasına baxırlarsa, magistratura pilləsinə qəbul olmaq üçün bal intervalı çox aşağıdır. İxtisas üzrə ortalama 80-90 bal arasıdır. Yəni bu il magistratura pilləsinə imtahan verənlərdən heç kim kənarda qalmayacaq, bu dəqiqdir. Yenə də deyirəm, belə vəsait çap etdirmək DİM-in büdcəsinə uyğun deyil. 56 proqram üzrə maksimum 200-300 nəfər keçid balının toplayıbsa, alıcılıq qabiliyyəti aşağı düşəcək.