"Daxili istiqamətlər üzrə sərnişin qatarlarına biletlərin qiymətləri yenidən qaldırıldı. Ötən ilin yanvar ayında 18 manat olan SV tipli vaqonlar üçün qiymət 2017-ci  ilin ortalarında 20.46 qəpik olub, bu aydan etibarən isə 22 manat 67 qəpik olub. Bir ildə qiymətlər 25% qaldırılıb. Qatarlarda dəyişilən nə olub ? Balakən istiqamətinə olan qatarda dəyişilən heç bir şey yoxdur.Yenə də köhnə tipli, sovetdən qalan vaqonlardır. Köhnə vaqonlar uğunlaşdırılaraq SV tipli edilib. Heç bir servis yoxdur: İnternet yox, istifadə üçün adicə enerji təminatı yox, televizor yoxdur.  İşləmək üçün şərait mövcud deyil. Kondisionerlərin tənzimlənməsi bütöv vaqon üzrədir, ayrılıqda kupenin isti-soyuqluğunu tənzimləmək mümkünsüzdür. Regionlardakı vağzallar pis gündədir. Dəmir yol xətləri bərbad vəziyyətdədir, qatarda sürət yoxdur – yenə də 450 km məsafəni 10 -12 saata gedir”.

Bu sözləri Azərbaycan İnternet Forumunun prezidenti Osman Gündüz SV tipli qatarların qiymət artımına münasibət bildirərkən özünün şəxsi sosial şəbəkə hesabında qeyd edib. Onun sözlərinə görə, Azərbaycan Dəmir Yolları (ADY) dövlət qurumu olaraq mövcud tələbatı tənzimləyə bilmirsə, hökumətə müraciət etməlidir:

"Belə olan halda qiymət artımı nə üçün edilir ? Kim verir bu təklifləri ? Hansı xərclər dəyişib ? Mediada ADY rəsmisi qeyd edir ki tələbat artıb və tələbatı tənzimləmək üçün qiymətləri artırmağa məcburdurlar.  Belə yanaşmamı olar ? Bu nə deməkdir ? Əgər doğrudan da belə yanaşma varsa, onda bu da anlaşılmazdır. Çünki açıqlamalar verilirdi ki yeni xətlər çəkirik, yeni qatarllar gətiririk, dünyaya çıxırıq və s. Düşünürəm ki ADY rəhbərliyinin qiymət artırma siyasəti çox qüsurludur. Daxili xətlər üçün normal bir inkişaf planı hazırlanmalıdır. Uzun müddətdir ki daxili istiqamətlərdə situasiya dəyişməz olaraq qalır. Qısa bir zamanda Dəmir Yol Vağzalını beynəlxalq standartlara uyğunlaşdırmaq mümkün olubsa, deməli digər sahələrdə də bu mümkündür.  Düşünürəm ki, əgər ADY bir dövlət qurumu olaraq mövcud tələbatı tənzimləyə bilmirsə, onda hökumətə müraciət etməlidir, konkret layihələr hazırlanmalıdır, özəl sektor bu sahəyə cəlb edilməlidir”.

Nəqliyyat eksperti Eldar Bəşirov saytımıza bildirdi ki, qiymət artımı əlavə xərclərlə bağlı ola bilər:

"Qiymət artımı mühasibatlıq əməliyyatıdır. Ola bilər ki, əvvəllər xammal və ya istifadə üçün çəkilən xərclərin qiymətində artım müşahidə olunsun.  Ona görə də, düşünürəm ki, qiymətlərin artması əlavə xərclərlə bağlıdır”.