Bildiyimiz kimi, AR Nazirlər Kabinetinin qərarına əsasən Sumqayıt şəhərində sərnişindaşımanı şəhər İcra Hakimiyyəti başçısının tabeliyində "pilot layihə” çərçivəsində yaradılan "Sumqayıt Nəqliyyat” Məhdud Məsuliyyətli Cəmiyyəti həyata keçirir. Şəhər daxili nəqliyyatda istifadə üçün yeni və müasir tipli avtobusların buraxılması təqdirəlayiqdir. Lakin bu sahədə problemlər qalmaqdadır. Əhali sərnişindaşımadan və bəzi marşrut xətlərinin fəaliyyətindən narazıdır. Mövzunun aktuallığını nəzərə alaraq, rəsmi internet səhifəmizdə Sumqayıtda marşrut xətlərindən razısınızmı? sualı ilə sorğu keçirdik. Sorğuda sərnişindaşımada olan problemlərdən və sərnişinləri maraqlandıran məsələlərlə bağlı sual və şərhlərin bir qismini ümumiləşdirib Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumova ünvanladıq.
Xeberle.com idarə rəisinin cavablarını təqdim edir.
- Tofiq müəllim, bir müddət öncə şəhərdə 25 saylı marşrut, bu yaxınlarda isə 22 saylı marşrut xətti ləğv olundu. Həmin marşrut xətlərinin bağlanmasının əsas səbəbləri nədir? Şəhər sakinləri bu marşrutların yenidən fəaliyyət göstərməsini istəyirlər...
- Bu marşrut xətlərinin bərpa olunması qeyri mümkündür. Çünki 25 saylı marşrut xətti binaların yaxınlığından, demək olar ki, blokların qarşısından işləyirdi. Marşrut xəttinin həyətlərdən keçməsinə narazılıq əlaməti olaraq şəhər rəhbərliyinə çoxsaylı şikayət ərizələri daxil olurdu. Bu səbəbdən də həmin marşrut xətti bağlandı və yenidən açılması mümkün deyil. 22 saylı marşrut xəttinə gəldikdə isə, həmin marşrut xətti qeyri-qanuni tikilmiş yaşayış massivi ərazisindən keçirdi və həmin ərazidə evlər sıx yerləşib. Yollar isə çox dar və ürəkaçan vəziyyətdə olmadığından həmin əraziyə yeni avtobusların hərəkəti mümkünsüzdür. Bu səbəbdən də marşrut xətti saxlanıldı. Lakin ərazidə yaşayan sakinlər çox az piyada yol qət edərək dayanacaqlara gəlib, şəhərin istənilən istiqamətində işləyən marşrut xəttlərindən rahatlıqla istifadə edə bilərlər.
- Sərnişinlər avtobus sürücülərinin qaydalara əməl etmədiklərini, işıqforun qırımız işığına məhəl qoymadıqlarını deyirlər. Şikayətlər arasında sürücülərin sərnişinlərə qarşı kobud davrandığı da bildirilir. Bu barədə nə deyə bilərsiniz?
- Avtobusların işıqforun qırmızı işığında keçməsinə və piyada keçidlərinin üstündə saxlamaqlarına, bu tamamən bizim sürücülərin günahı deyil. Şəhərdə işıqforlar düzgün yerlərdə qurulmayıb, piyada keçidi ilə işıqfor arasında müəyyən məsafə olmalıdır. Sürücülərin kobudluqları barədə isə, hər həftə bizim idarə tərəfindən maarifləndirici tədbirlər keçirilir. olur. Lakin hələ də narazılıqlar və kobudluq edən sürücülərimiz var. Biz bu barədə mütamadi tədbirlər görürük və çalışırıq ki, bu neqativ halları aradan qaldıraq.
- Sürücülərə plan qoyulması avtobusların bir-birini qovması ilə müşahidə olunur. Avtobuslarda plan məsələsi nə vaxt aradan qaldırılacaq?
- Sürücülərin plan məsələsinə görə bir birini tələsdirməsi, sərnişinlərlə kobud rəftarları barədə məlumatımız var. Bu istiqamətdə tədbirlər görülür və yaxın müddətlərdə çalışacayıq bütün marşrutlar kart sisteminə keçsin. Yol verilən digər neqativ hallarda aradan qaldırılacaq.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
