Bu barədə Xeberle.com-a massiv sakinləri adından Vüsal Hacıyev bildirib. Sakinlərin müraciətində qeyd olunur ki, bu günə kimi ərazinin su və işıq problemləri böyük ölçüdə həll olunub. Ərazinin qazlaşdırılması istiqamətində də iş aparılır. Amma hələ də massivin ciddi problemləri öz həllini gözləyir: Kanalizasiya sisteminin, bağça və orta məktəbin olmaması massivin əsas problemlərindəndir. Ərazidə kanalizasiya xətti olmadığından çirkab sular "şambo" deyilən yeraltı quyuya doldurulur. Vaxtaşırı çirkab sularının çirkabçəkən çənlərə vurulub daşınması bir çox yoluxucu xəstəliklərin yaranmasına və yayılmasına zəmin yaradır. Bu eyni zamanda böyüməkdə olan uşaqların səhhətinə mənfi təsir edir. Üstəlik, yeraltı çirkab suları insanların min-bir əziyyətlə inşa etdikləri evlərin bünövrəsini sıradan çıxarır. Bu isə qəzaya və evlərin uçmasına yol açır. Bəzi yerlərdə çirkab sular yola dağılır. Beləcə çoxsaylı infeksiyalar, xəstəliklər yaranmağa başlayır. Ətrafa yayılan çirkab suların iyi buranı keçilməz sərhədə çevirir. 2013-cü ildə salınmağa başlayan şəhərcikdə yeni evlər inşa olunur və əhalinin sayı artır. Sakinlər kanalizasiya problemi ilə bağlı bir neçə dəfə aidiyyatı orqanlara müraciət ediblər. Ancaq bu günə kimi heç bir nəticəsi yoxdur".

Sakinlər deyirlər ki, əraziyə yaxın təlim-tədris ocaqları olmadığından valideynlər uzaq məsafələri qət edərək övladlarını Sumqayıt şəhərində yerləşən bağçalara, məktəblərə aparırlar: "Bu isə əlavə vaxt itkisi və maddi problemlər deməkdir. Bütün bunları nəzərə alaraq, qəsəbə sakinləri adından Sumqayıt şəhər İcra Hakimiyyətinin icra başçısı Zakir Fərəcova müraciət edib, bu problemlərin həlli yolunda sizdən kömək istəyirik. İnanırıq ki, sizin göstərişinizlə aidiyyatı orqanlar bu məsələni həll edəcəklər. 2013-cü ildən qurulmağa başlayan Yeni Sumqayıt şəhərciyinin sakinləri bu günə kimi sadalanan problemləri həll etmək üçün aidiyyatı orqanlara çoxsaylı müraciətlər edib. Amma hələ də problemlər həll olunmayıb".

Sumqayıt şəhər İcra Hakimiyyətinin Mətbuat katibi Eyvaz Qocayev Xeberle.com-a bildirib ki, şəhərdə mövcud olan problemlərin aradan qaldırılması istiqamətində rəhbərliyini tapşırığı ilə işlər aparılır: " "Yeni Sumqayıt" yaşayış massivinin də mövcud problemləri mərhələli şəkildə həll olunacaq". 

Xədicə Səxavətqızı

Xeberle.com