Xeberle.com-un elektron ünvanına Sumqayıtdakı iri marketlərlə bağlı şikayət məktubu daxil olub. Şikayəti olduğu kimi təqdim edirik:

"SƏBA" şirkətinin ənənəvi olaraq hər ayın 15-i keçirdiyi "SƏBA səxavəti" günü bu dəfə hamı tərəfindən narazılıqla qarşılanıb. Mən bir Sumqayıt sakini kimi oktyabrın 15-i səhər saat 10:00 radələrində 9-cu mikrorayondakı "Ucuz market", 9-cu mikrorayondakı "Vəfa market", 30-cu məhəllədəki "BazarStore" və "Araz market" lərdən bu şirkət məhsulundan almaq istəsəm də, bu dükanların hamısında mənə saat 10 olmasına baxmayaraq artıq satılıb qurtarıb cavabını verdilər. Xatırladım ki, bu dükanların hamısında kampaniya olacağı və hərəsində nə qədər hədiyyə bağlaması olduğu 1 gün əvvəldən "SƏBA" şirkəti tərəfindən internet vasitəsi ilə elan olunmuşdu.

Siyahıya əəasən bu dükanlarda 120-200 hədiyyə olduğunu qeyd etsələr də, minimum olaraq 120 ədəd "SƏBA" toyuğunu satmaq üçün satıcı hər müştəriyi minimum 2 dəqiqə vaxt sərf etsə, bu 240 dəqiqə edir ki, bu da saat hesabı ilə 4 saat edir ki, məntiqnən saat 9-da açılan dükanda ən azı saat 13:00 dək satış olmalı idi.Amma səhər saat 10:00 da artıq hər yerdə satışın bitməsi qaranlıq məqamlardan xəbər verir. Ya dükanlar əhaliyə çatacaq məhsulu mənimsəyib yaxud da ki, "SƏBA" broyler yalançı reklamla məşğuldur. Xahiş edirəm camaatı yalançı reklamla aldatmayın!

Xeberle.com olaraq "SƏBA" şirkəti ilə əlaqə saxladıq. Şirkətin meneceri Minə Məmmədova söylədi ki, artıq problemi bilirik və bu il təxminən 40-adək bu yöndə şikayət qəbul etmişik: "Çox təəssüf edirik ki, artıq saat 8-dən bu məhsullar alınmağa başlanılır. Özü də ayrı ayrı istehlakçılar, sakinlər tərəfindən yox, kiçik marketlərin sahibləri tərəfindən. Yəni iri marketlər bu malları kiçik marketlərə satır. Kiçik marketlər də sonradan bunu pərakəndə halda satırlar. Nəticədə də, saat 10 üçün sözügedən hədiyyəli mallarımız qurtarır. Artıq bunun qarşısını almağın üsülunu tapmışıq, bundan sonra ciddi olaraq marketlərə tapşıracağıq ki, hər bir alıcıya bu hədiyyəli mallarımızdan yalnız bir ədəd verilsin”, - deyə şirkətin əməkdaşı bildirib.

Aytən Əli
Xeberle.com