Yay fəslində havaların kəskin dəyişməsi xəstəlikləri də özü ilə bərabər gətirir. Bir sıra hallarda havaların kəskin soyuması ilə əlaqədar bədən temperaturu soyuğa uyğunlaşa bilmir. Buna görə də xroniki xəstəliklər belə vəziyyətlərdə daha da kəskinləşməyə başlayır. Soyuq hava şəraiti angina, bronxial-astma və digər xəstəliklərin, necə deyərlər, inkişafına münbit şərait yaradır. Bəzən bir çoxumuz bu mövsümdə yaranan xəstəliklərə o qədər də əhəmiyyət vermirik. Amma unutmayaq ki, hava dəyişkənliyi xəstəlikləri uşaqların fəaliyyətinə maneçilik törədən əsas amillər sırasında birinci yerdə qərar tutur.

Havaların kəskin dəyişməsi immuniteti zəif olan orqanizmlər üçün daha təhlükəli hesab edilir. Ümumiyyətlə, hava dəyişkənliyinə hər orqanizm fərqli reaksiya verir. Əgər insan tam sağlamdırsa, ona fəsil və hava dəyişkənliyinin hər hansı təsiri olmur. Amma sağlamlığında problem yaşanan, immun sistemi zəif olanlar tez bir zamanda buna reaksiya verirlər.

Bəs belə havalarda xəstəliklərdən necə qorunmaq olar?

Pediatr Lalə Eyvazqızı deyir ki, yay fəslində havaların belə kəskin dəyişməsi allergiyalı uşaqlara ümumiyyətlə pis təsir edir. Havada rütubət artır, uşaqlarda allergiyanın qalxmasına səbəb olur. Belə ki, uşaqlarda burun tutulması, göz yaşarması müşahidə olunur, onlar halsız və yuxulu olurlar: "Bu da valideynləri narahat edir. Amma allergiyalı uşağı olan valideynlər belə havalarda hansı tədbirlər görülməli olduğunu bilirlər. Bəzi valideynlər isə belə hallara fikir vermirlər və bu da uşaqlarda xroniki hala çevrilir. Yaxşı olardı ki, analar belə uşaqlara diqqət yetirsinlər və lazımi tədbirlər görsünlər. Evin havasını eyni temperaturda saxlasınlar, ümumiyyətlə otaq termometrlərindən istifadə etsələr daha yaxşıdır. Evi eyni tempraturda saxlaya bilmək üçün bu vacibdir".

Pediatrın sözlərinə görə, bəzən hava dəyişkənliyi uşaqlarda başqa əlamətlərlə də özünü biruzə verir: "Rotavirusların, intrervirusların yaranmasına səbəb olur ki, bununla parallel olaraq bu viruslar da qoşularaq uşaqlarda ağırlaşma halları yarada bilir. Uşaqlarda bu günlərdə daha çox mədə -bağırsaq pozğunluğu hallarına rast gəlinir. Diareyaların da yaranma səbəbi baslıca olaraq uşaqların qidası ilə əlaqəlidir. Valideynlər diqqət etməlidirlər ki, uşaqlar gün ərzində bol su içsinlər, lakin bu normanı hazır şirələrlə əvəz etmək heç də yaxşı hal deyil. Otaq tempraturunda olan sadə su, əsasən də allergiyalı uşaqlarda isə heyva dəmləməsi, yaxud da kompotlar onların həm immun sistemlərinə, həm də bronxlarının sakitləməsi üçün yaxşı vasitədir. Anseptik ot dəmləmələri də ağız boşluğu və bronxların, o cümlədən bağırsaqların da təmizlənməsi üçün faydalıdır".

Bəzi uşaqlarda yuxu rejimi pozulur, çünki...

L. Eyvazqızı bildirir ki, hava dəyişkənliyi uşaqlarda yuxululuq da əmələ gətirir ki, bu normaldır: "Bu qorxulu hal deyil, yuxunun özü də uşaq üçün vacib faktordur. Təbii ki, bir xəstəliyi yoxdursa uşağın belə havada normadan artıq yatması bir siqnal deyil. Lakin diareyalı, qızdırmalı uşağın uzun müddətli yatması normal simptom sayılmır. Belə havalarda rütubətlilik normadan artıq olduğu üçün allergiyalı, asmatik uşaqlarda isə burun tıxanıqları yaranır, bu da uşaqları narahat edir və gepaksiya yaradır. Belə olduğu halda da onlar tez xəstələnirlər, viruslara tez yoluxurlar. Bunun qarşısını ala bilmək üçün analar ev şəraitində dəniz duzundan damcı formasında istifadə edə bilərlər. Uşaqları qalın geyindirməyi məsləhət görmürəm. Hava azacıq soyuyan kimi üst-üstə uşaqları geyindirib tərlətmək də yaxşı hal deyil. Bununla analar uşaqları xəstəliyə dəvət etmiş olurlar. Havalar soyuq olsa da, xüsusilə uşaqları açıq havadan məhrum etmək olmaz. Əksinə onlar açıq havada çox olmalıdır. Bu zaman qalın paltarları üst-üstə geyindirmək, uşağın ağzını müxtəlif şərflərlə sıx bağlamaq düzgün deyil. Açıq havada uşaq daim hərəkət etməli, müxtəlif oyunlar oynamalıdır".

Xədicə Səxavətqızı

Xeberle.com

Xəbərdən istifadə edərkən istinad etmək vacibdir.