Sumqayıtda şadlıq sarayının sahibi: "Bir toydan qazandığımızı paytaxtın şadlıq evinin tək fotoqrafı bir toyda qazanır”

Yas məclislərində israfçılığa son qoymaq üçün tətbiq edilən qadağanın bir gün toy şənliklərinə də yönləndiriləcəyi gözlənilən idi.

Artıq şadlıq saraylarının sahiblərinə menyuların sadələşdirilməsi üçün təlimatların verildiyi barədə xəbərlər var. Deyilənə görə, təlimatda şadlıq evləri sahiblərinə süfrədə nemətlərin azaldılması və menyu qiymətlərinin 15-25 manata qədər ucuzlaşdırılması kimi göstərişlər verilib. Hətta təlimata əməl etməyən şadlıq evi sahiblərinin böyük məbləğdə cərimə ediləcəkləri də qeyd edilib.

Menyuların sadələşdirilməsiylə bağlı təlimatın Sumqayıt şəhərinin şadlıq saraylarına da daxil olub–olmadığını araşdırmağa çalışdıq.

Məsələni dəqiqləşdirmək üçün "Xəlifə”, ”Nur”, ”Qubadlı”, "Şahanə”, ”Dan ulduzu” , "Gold Palace” şadlıq saraylarının sahiblərinə müraciət etdik. Şadlıq evlərinin yetkililəri bir qayda olaraq bildirdilər ki, menyuların sadələşdirilməsi haqda təlimat almayıblar.

"Şahanə” şadlıq evinin müdiriyyəti isə onlara yalnız məsləhət şəklində müraciətlərin daxil olduğunu söylədi.

Xatırladaq ki , Sumqayıtın şadlıq saraylarının bir çoxunda menyu toylarına az təsadüf edilir. Toy şənlikləri əksər hallarda şadlıq evinin icarəsi yolu ilə keçirilir. Ona görə də adları çəkilən şadlıq saraylarının sahibləri bu təlimatı Sumqayıtın şadlıq evləri üçün keçərli olmadığını düşünürlər.

"Dan ulduzu” şadlıq sarayının müdiri Sərraf müəllim Sumqayıtın şadlıq saraylarında mövcud olan menyu siyahılarını ən sadələşdirilmiş menyu olduğunu bildirdi. İsrafçılığın daha çox Bakı şəhərinin şadlıq evlərinə aid olduğunu deyən Sərraf bəy Bakı ilə Sumqayıt şadlıq evləri arasında nə qədər böyük fərq olduğu ilə bağlı müqayisələr də apardı: "Bakının şadlıq evlərində menyuda salatlar 8 növ olduğu halda, bizdə 3 növdür. Bizim bir toydan qazandığımızı paytaxtın şadlıq evinin tək fotoqrafı bir toyda qazanır.”

Şadlıq sarayının sahibi belə hesab edir ki, israfçılığın qarşısını almaq gərəkirsə, bunu ilk olaraq Bakı şəhərinin şadlıq evlərindən başlamaq lazımdır.

Aytən ƏLİ
Xeberle.com