"Yeni Sumqayıt” yaşayış massivində kimlər dövlət tərəfindən mənzillə təmin ediləcək?

"Sumqayıt şəhərində bir sıra yaşayış binaları və obyektlərin istismar müddəti başa çatıb. Artıq Heydər Əliyev prospektində bir neçə ikimərtəbəli yaşayış evi sökülüb. Əvəzində yeni, müasir tipli hündürmərtəbəli yaşayış evləri inşa edilib. Bu proses yavaş–yavaş da olsa, davam etdiriləcək. Bu yaxınlarda Bakı küçəsində də qəza vəziyyətində olan böyük bir yataqxana söküldü”. Bu barədə Xeberle.com saytına Sumqayıt şəhər Memarlıq və Şəhərsalma İdarəsinin rəis müavini Kamil Məmmədov məlumat verib.
K.Məmmədov daha sonra bildirib ki, bunun hansı tarixdə olacağı hələ dəqiq məlum deyil, amma 41-ci məhəllədə yerləşən yataqxanaların da söküləcəyi planlaşdırılır. Bunun üçün ilk öncə orda yaşayan sakinlərin normal şəraitli mənzillə təmin edilə bilmələri üçün müvafiq məbləğdə kompensasiya ödəniləcək.
Rəis müavini "İnşaatçılar” yaşayış massivindəki evlərin sökülməsi məsələsinə də toxunub. Xatırladaq ki, Sumqayıt şəhərinin ilk yaşayış massivi sayılan "İnşaatçılar”dakı taxta "fin” evlərin istismar müddəti artıq başa çatıb. Əsasən bir və iki mərtəbədən ibarət olan evlər söküldükdən sonra yerinə müasir tipli yeni çoxmərtəbəli yaşayış binalarının tikilməsi planlaşdırılır.
O ki qaldı "Yeni Sumqayıt” yaşayış massivinin nə vaxt hazır olmasıyla bağlı suala, memar cavab verdi ki, yaşayış massivinin baş planı artıq hazırdır. Təsdiq edilməsi üçün Azərbaycan Respublikası Nazirlər Kabinetinə göndərilib. Layihə Nazirlər Kabinetində təsdiq edildikdən sonra, yəqin ki, yeni ildən qəsəbənin inşasına başlanılacağı gözlənilir.

"Yeni Sumqayıt” yaşayış massivində əsasən Sumqayıtın bir sıra idarə və müəssisələrində məskunlaşmış qaçqın və məcburi köçkünlərin yeni mənzillə təmin ediləcəkləri bildirilir.

Aytən Əli
Xeberle.com