Bu dəfə "Facebook" və "İnstagram" sosial şəbəkələrində respondentlərə "Sumqayıtda hansı ərazilərdə qaz təzyiqi aşağıdır?" sualını ünvanladıq.

Sorğuda iştirak edən izləyicilərimizin cavabına əsasən demək olar ki, Sumqayıtın əksər ərazilərində yaşayış evlərinə qaz təzyiqində azalma müşahidə olunur. Lakin verilən 180 cavab arasında daha çox üstünlük Corat bağları və 9-cu mikrorayon ərazilərindən təşkil edib.

52-ci məhəllə (Daş bazarı), Qurd dərəsi, Yaşıldərə adlanan ərazilər və həmçinin Şirvan qəsəbə sakinləri də qazın təzyiqinin aşağı olmasından şikayətçidirlər.

Mövcud problemlə əlaqədar "Azəriqaz”ın İctimiyyətlə əlaqələr şöbəsinin müdiri Ceyhun Səfərovla əlaqə saxladıq. Qurum rəsmisi qeyd olunan ərazilərə baxış keçirildiyini və həmin ərazilərə qazın verilişinin stabil olduğunu bildirdi. O, həmçinin qeyd etdi ki, bəzi mənzillərdə qazın zəif olmasına səbəb cihazlara edilən müdaxilələr və ya qaz xətlərində yaranan problemlər, əlavə olaraq qoşulan borular da ola bilər: "Problemin yerində araşdırılması üçün biz "Azəriqaz”ın Sumqayit regional idarəsinə məlumat vermişik və şikayəti olan vətandaşlardan xahiş olunur ki, günü bu gün gedib idarədə ərizə ilə şikayətlərini və ünvanlarını qeyd etsinlər. Hər bir şikayət qeydə alınan mənzillərə baxış keçiriləcək”.

Xədicə Səxavətqızı

Xeberle.com