Məlum olduğu kimi, Sumqayıtda fəaliyyət göstərən "Liman" klinikası cari ilin iyun ayında fəaliyyətini dayandırdı.
Klinika rəhbərliyi öncə bunun təmirlə bağlı olduğunu bildirsə də, Səhiyyə Nazirliyinin saytında bu klinikanın lisenziyasının vaxtının bitdiyi əks olunurdu. Klinika qısa zamanda problemi həll edəcəyini bəyan etmiş, işçilərinə qısamüddətli fasilə barədə məlumat vermişdi.
Ancaq görünən odur ki, klinika başladığı təmiri bitirsə də, lisenziya problemini həll edə bilməyib.
Bu günlərdə klinikanın nə üçün fəaliyyətini dayandırması ilə bağlı Səhiyyə Nazirliyinə İnformasiya sorğusu göndərmişdik. Sorğuda klinikanın bir neçə ay öncə gizli fəaliyyət göstərdiyi üçün cərimələnməsi barədə də suallarımıza cavab istəmişdik. Bu həftə Nazirlik bizi maraqlandıran suallara aydınlıq gətirib. Beləliklə, Nazirliyin cavab məktubunda deyilir:
Azərbaycan Respublikasının Səhiyyə Nazirlyinin rəsmi internet saytı vasitəsi ilə ünvanladığınız 02 oktyabr 2014-cü il tarixli müraciətə Səhiyyə Nazirliyinin Analitik Ekspertiza Mərkəzində baxılmışdır.
Özəl tibb fəaliyyəti ilə məşğul olmaq üçün xüsusi razılıq (lisenziya) almaq məqsədi ilə "Liman Group" MMC-nin Azərbaycan Respublikası Səhiyyə Nazirliyinə müraciətinə əsasən, Səhiyyə Nazirliyinin tibb müəssisələrinin lisenziyalaşdırılması üzrə Komissiyası tərəfindən həmin müəssisəyə baxış keçirildikdən sonra tibb fəaliyyətinə xüsusi razılıq (lisenziyanın) verilib-verilməməsi barədə qərar qəbul olunacaqdır.
Eyni zamanda bildiririk ki, Sumqayıt şəhəri, 6-cı mikrorayon, ev 35 ünvanında yerləşən "Liman Group" MMC-yə məxsus tibb müəssiəsi xüsusi razılıq (lisenziya) olmadan özəl tibb fəaliyyəti ilə məşğul olduğuna görə Azərbaycan Respublikasının İnzibati Xətalar Məcəlləsinin 64.1-ci maddəsinə əsasən Səhiyyə Nazirliyi tərəfindən inzibati tənbeh növü kimi cərimə haqqında qərar çıxarılmışdır.
Qeyd edək ki, cavab məktubu Nazirliyin Analitik Ekspertiza Mərkəzinin direktor müavini Rəşad Mafusovun imzası ilə göndərilib.(168saat.com)
Xəbərdən istifadə edərkən istinad etmək vacibdir.
