Yeni il ərəfəsində və yeni ildə keçirilən tədbirlərdə, xüsusən də küknar ağacı - yolka şənliklərində insanların kütləvi şəkildə toplaşmasını, bu tədbirlərdə məktəblilərin, azyaşlıların daha çox iştirak etməsini nəzərə alaraq yanğın təhlükəsizliyi məsələlərinə daha ciddi yanaşılmalıdır. Bəzən böyüklər tərəfindən yanğın təhlükəsizliyinə laqeyd münasibət, uşaqların nəzarətsiz qalması, yanğın təhlükəsizliyi qaydalarının müxtəlif formalarda pozulması bayram şənliklərinin bədbəxt hadisə ilə bitməsinə gətirib çıxarır.
FHN Sumqayıt Regional Mərkəzi Xeberle.com-a Sumqayıt sakinlərinin Yeni il bayramı ərəfəsində və bayram gününda bilməli olduqları təhlükəsizlik qaydalarını açıqlayıb.

Uşaqların yolka şənlikləri zamanı odla dəcəlliyi də Yeni il şənliklərinin eyni sonluqla bitməsi ilə nəticələnir. Buna görə də yolka şənliklərini təşkil edərkən yanğın təhlükəsizliyi tədbirlərinin düzgün həyata keçirilməsini bilmək, müvafiq maarifləndirmə işlərini aparmaq, yanğın təhlükəsizliyi qaydalarına azyaşlılar və məktəblilər tərəfindən əməl olunmasına nəzarət etmək vacibdir.

Mədəni-maarif ocaqlarında, tədris müəssisələrində, digər yerlərdə Yeni il yolkası çölə iki sərbəst çıxış yolu olmaqla, ikinci mərtəbədən yuxarı olmayan, yanmayan arakəsmələri olan otaqlarda qurulmalıdır.

Yolka şənlikləri keçirilən binalar yanğın təhlükəsizliyi ilə bağlı tikinti norma və qaydalarının tələblərinə tam cavab verməlidir.

Birinci mərtəbədəki ehtiyat çıxış yolu birbaşa küçəyə və yaxud ikinci mərtəbədən qısa dəhlizlə birbaşa pilləkən qəfəsinə çıxmalıdır. Yolka qurulan binaların divarları, üst örtüyü və arakəsmələri odadavamlı olmalıdır. Yolka şənliyi keçirilən otaqların qapıları mütləq çölə açılmalıdır. Səhər və axşam şənlikləri zamanı qapılar açıq saxlanılmalıdır. Ehtiyat çıxış qapıları üzərində yaşıl elektrik işığı ilə "Çıxış" sözü yazılmış göstərici-lövhə asılmalıdır. Yolka qurulmuş otaqların yaxınlığındakı dəhlizlərin, foyelərin və sair ehtiyat çıxış qapıları da bu cür işıqlandırıcı göstəricilərlə və tez açıla bilən cəftə ilə təmin olunmalıdır.

Yolka qurularkən yanğın təhlükəsizliyi qaydalarına ciddi əməl edilməlidir. Birinci növbədə yolka – küknar ağacı yerə möhkəm bərkidilməlidir. Küknar ağacı bərk dayaqlar üzərində elə quraşdırılmalıdır ki, onun budaqları tavana və divarlara toxunmasın. Yolkanı işıqlandırarkən yalnız elektrik cərəyanından və zavodda hazırlanmış standarta uyğun elektrik qurğu və cihazlarından istifadə olunmalıdır. Küknar ağacının bəzədilməsində istifadə olunan lampalar ardıcıl qoşulmalı və bu zaman gərginlik 12 voltdan, cərəyan 25 vatdan artıq olmamalıdır. Yolkada quraşdırılmış elektrik naqilləri və işıqlandırma lampaları saz olmalı və etibarlı izolə edilməlidir. İşıqlandırma zamanı nasazlıq aşkar edildikdə (naqillər qızdıqda, lampalar yanıb-söndükdə, qığılcım olduqda və s.) dərhal onu elektrik şəbəkəsindən ayırmaq lazımdır.

Yolka işıqlandırılarkən istifadə olunan elektrik naqilləri birbaşa avtomat qurğu vasitəsi ilə elektrik lövhəsinə və ya rozetkaya qoşulmalıdır. Elektrik naqillərini bir-biri ilə birləşdirdikdə mütləq lehimləmə, presləmə, qaynaq üsulundan istifadə edilməlidir. Naqilləri bir-birinə başqa vasitələrlə birləşdirmək qəti qadağandır.

Bütün bunlarla yanaşı, yadda saxlamaq lazımdır ki, küknar ağacını - yolkanı işıqlandırarkən elektrik təsərrüfatı ilə bağlı bütün yanğın təhlükəsizliyi qaydalarına ciddi riayət olunmalıdır.

Unutmaq olmaz ki, yolkanı şamlarla işıqlandırmaq ciddi yanğın təhlükəsi yaradır. Yeni il şənliyi keçirilərkən şamlardan, atəşfəşanlıq məqsədilə fişənglərdən istifadə etmək olmaz. Şam ağacının tezalışan materiallardan hazırlanmış oyuncaqlarla, odadavamlı məhlulla hopdurulmamış pambıqla bəzədilməsi də olduqca təhlükəlidir. Bu səbəbdən də yolkanı oddan qoruyucu maye hopdurulmamış pambıqla bəzəmək, budaqlarından tezalışan materiallardan hazırlanmış oyuncaqlar asmaq, yolkaya bertole duzu səpmək qadağandır.

Yolka şənlikləri zamanı pambıqdan, tənzifdən, kağızdan və digər tezalışan materiallardan tikilmiş paltarlar geyinmək olmaz.

Yolkanın quraşdırıldığı otaqlarda atəşfəşanlıq düzəltmək, benqal şamları yandırmaq qadağandır.

Yolka şənliklərinin keçirildiyi otaqlarda işiqlandırma sistemi olmadıqda tədbir yalnız gündüzlər keçirilməlidir.

Yolka şənliklərinin keçirildiyi bütün yerlər dövlət yanğın nəzarəti qurumlarının nəzarətində olmalıdır. Yeni il şənliklərinin təşkılatçıları, onun hər bir iştirakçısı həmin qurumların əməkdaşlarının yaxın köməkçisi olmalı, Yeni il yolkası qurulan zaman yanğına qarşı qaydaların yerinə yetirilməsinə nəzarət etməli, yanğın təhlükəsizliyi ilə bağlı aşkar olunmuş halların aradan qaldırılması üçün müvafiq tədbirlər görməlidirlər.

Yeni il şənlikləri keçirilən yerlərdə texnoloji avadanlıqlar, qızdırıcı cihazlar normal iş rejimində olmalı, onlar yanğın cəhətdən təhlükəsiz vəziyyətdə işləməlidirlər. Yolka şənliklərindən əvvəl bütün təhlükəli nasazlıqlar və qəza halları aradan götürülməlidir. Yeni il şənlikləri keçirilən hər bir yerdə baş verə biləcək yanğının həcmini və nəticəsini məhdudlaşdıran zəruri müdafiə tədbirləri nəzərdə tutulmalıdır.

Yeni il şənlikləri keçirilən müəssisələrdə yanğın təhlükəsizliyinə müəssisə rəhbərləri məsuliyyət daşıyırlar. Müəssisə rəhbərliyi Yeni il şənlikləri keçirilən yerlərin yanğın təhlükəsizliyinə cavabdeh olan məsul şəxs ayırmalı, yolka şənliyi keçirilərkən sinif rəhbərləri, müəllimlər, tərbiyəçilər yanğın təhlükəsizliyi və yanğın zamanı təxliyə tədbirləri ilə əlaqədar təlimatlandırılmalıdır. Yeni il şənlikləri keçirilən yerlər ilkin yanğınsöndürmə vasitələri ilə təmin olunmalıdır.

Yolka şənlikləri zamanı aşağıdakılar qadağan olunur:

- pəncərələrində dəmir barmaqlıqlar olan otaqlarda tədbirlərin keçirilməsi;

- atəşfəşanlıq məqsədilə partlayıcılardan, güclü projektorlardan, şamlardan, fişənglərdən və digər yanğın təhlükəli işıqlandırıcı maddələrdən istifadə edilməsi;

- tədbir zamanı qaynaq, rəngləmə və digər yanğıntörədici partlayış təhlükəli işlərin görülməsi;

- oturacaqların ara məsafəsinin azaldılması, əlavə stul və kreslolar qoymaqla cərgəarası keçidlərin bağlanması;

- tamaşa vaxtı salonda işığın tam söndürülməsi;

- nəzərdə tutulduğundan artıq insanların zala buraxılması;

- yanğın təhlükəsizliyinə cavabdeh olan növbətçilərin və yanğın təhlükəsizliyi orqanı əməkdaşlarının olmadığı zaman tədbirlərin keçirilməsi.

Unutmaq olmaz ki, yalnız göstərilən qaydalara ciddi riayət etməklə yolka şənliklərini bədbəxt hadisələrsiz keçirmək olar.

FHN Sumqayıt Regional Mərkəzi