Azərbaycanda tikilən yeni çoxmərtəbəli binalarda vətəndaşlara qarşı dələduzluqların edilməsilə bağlı məlumatlara tez-tez rast gəlirik. Bu dələduzluqlar daha çox bir mənzilin bir neçə şəxsə satılması yolu ilə həyata keçirilir. Məsələ ilə bağlı saysız-hesabsız məhkəmə işləri və həbslər var. Əgər bir mənzilin bir neçə şəxsə satılması faktlarına müəyyən şirkətlərdə rast gəlinirdisə, üstü açılan dələduzluqların bütün tikinti şirkətləri tərəfindən həyata keçirildiyi vurğulanır. Söhbət mənzillərin sahəsində vətəndaşların aşıq-aşkar aldadılması, bununla da tikinti şirkətlərinin qeyri-qanuni yolla milyonlarla vəsait əldə etməsindən gedir. Bununla yanaşı, hündürmərtəbəli binalarda komunnal xidmətlərlə bağlı problemlər də yaşanır. Belə ki, tikinti şirkətləri əvvəlcədən tikilən binalarda bütün xidmətlərin təşkil edəcəyini vurğulasa da, sonradan mənzil alanlar bunun əksi ilə qarşılaşırlar. Ceyranbatan qəsəbəsinin bir qrup sakini isə "RTR” MMC-dən nəinki narazıdırlar, artıq yaşayışlarından təngə gəliblər. Onlar dəfələrlə müvafiq orqanlara - Azərbaycan Respublikasının Prezdenti İlham Əliyevə, ölkənin Birinci xanımı, Heydər Əliyev Fondunun prezidenti, millət vəkili Mehriban Əliyevaya, Abşeron Rayon İcra Hakimiyyətinin başçısı Zakir Fərəcova və s. Şikayət məktubları göndəriblər.

Ceyranbatan qəsəbəsinin girişində, yolun kənarında, 20 Yanvar küçəsində yerləşən hündürmərtəbəli binada mənzil alan Ramin Məhərrəmov da binanı tikən "RTR” MMC-nin özbaşınalığından böyük ölçüdə narazıdır. R.Məhərrəmov deyir ki, müqavilə bağlayaraq 2008-ci ildə həmin binadan mənzil alıb. Onun sözlərinə görə 2006-cı ildən tikilməyə başlayan iki il sonra isə tam təchizatla təhvil verilməli olan bina sakinlərin arzusunu ürəyində qoyub. R.Məhərrəmov tikinti şirkətindən 2008-ci ildən mənzil aldığını bildirir və əlavə edir ki, kaş almayaydı. Fikrini isə elə həmin gündən başlayan problemlərlə əlaqələndirərək belə izah edir: "Mən 2008-ci ildə həmin binadan tikinti şirkətinin rəhbəri Zeynalabdin adlı şəxsdən mənzil aldım. Mənzili alandan sonra təmir etməyə başladım. Amma...”

Şikayətçi deyir ki, sözügedən binada problemlər tükənmir. 80 mənzildən təxminən 65-də ailə yaşayır. Əvvəl işıq, lift, sonra isə qaz təchizatı ilə bağlı çatışmazlıqlar yaşanmağa başladı. Məskunlaşma olmasına baxmayaraq, qazın nə vaxt veriləcəyi hələ də sual altındadır. Sayğacların quraşdırılmasında problem yarandığından onlar artıq ödənişlər etməli olurlar. Misal üçün, hazırda binanın ana xətt, yəni ümumi elektrik enerjisi sayğacına təxminən 23 min manat borc yığılıb. Hər bir mənzilə ayrıca sayğac qoyulmalıdır və bu məbləğ hər bir ailədən ayrı-ayrılıqda çıxılmalıdır. Ümumiyyətlə, hər bir kommunal xidmət üzrə ayrıca sayğac quraşdırılmalıdır ki, sonradan nəinki vətəndaşlarla dövlət qurumları, elə vətəndaşlar özləri arasında da hansısa narazılıq yaranmasın. Burada mənzil alan sakinlər ya binanı inşa etmiş şirkətin sahiblərini tapa bilmirlər, ya da MTK rəhbərləri binaya, mənzilə qaz xəttinin çəkilməsi üçün sakinlərdən əlavə pul tələb edirlər. Bu şirkətin rəhbəri gəlib hər kommunal idarələrlə, o cümlədən işıq, qaz və sair müqavilə bağlamalıdır. Şikayətçinin sözlərinə görə, o şəxslər nəinki sıravi vətəndaşları, heç məmur, yaxud deputatları da vecinə almır, uzun illərdir ki, öz istədiyini yeritməklə, Azərbaycan vətəndaşlarının, öz müştərilərinin haqqını yeməkdədir. Qısası, son illərdə sakinlərin aktual problemlərindən biri, bəlkə də başlıcası - "novostroyka”larda qaz təminatı məsələsidir. R.Məhərrəmov də deyir ki, yaranan problemlərlə bağlı, xüsusən qaz probleminə dair dəfələrlə müvafiq orqanlara müraciət ediblər.
Hətta 44 saylı Sumqayıt-Abşeron 4-cü seçki dairəsindən deputat seçilmiş Hacı Salayevə də üz tutublar. Axır ki, onların səsinə səs verən tapılıb. Belə ki, ərazi üzrə millət vəkili olan Hacı Salayev bir neçə dəfə sakinlərlə görüşüb və onların problemlərinin həll edilməsində müvafiq orqanlarla danışaraq sakinlərə yardımçı olmağa çalışıb.
Şikayətçi deyir ki, deputata müraciətdən sonra Abşeron Rayon İcra Hakimiyyətinin başçısı Zakir Fərəcov da onları qəbul edərək problemlərini dinləyib və müvafiq orqanlara problemin həll edilməsi üçün müəyyən tapşırıqlar da verib. Gəl ki, bundan sonra da sakinlərin muradı gözündə qalıb. Bina sakini vurğulayır ki, deputatın məsələyə müdaxiləsində sonra tikiliyə ümumi qaz xətti də çəkilib.
R.Məhərrəmovun sözlərinə görə, yaşadıqları binada Zeynalabdin adlı şəxsdən sonra Pünhan adlı şəxs peyda olub. Əsas problemlər də bundan sonra başlayıb. Bina rəhbərləri öz aralarında ya bilərəkdən, ya da anlaşılmazlıq nəticəsində "ötür-ötür" oyununa başlayıblar, nəticəsi isə təbii ki, sakinlərə əziyyət verib. Ən dəhşətli məqamlardan biri də budur ki, sahibkarların "Əmrah" bankdan kredit götürüb bina tikməsi və sonradan krediti verə bilməməsi problemi bina sakinlərinin başında çatlayıb. İş orasındadır ki, bank binaya gələrək bəzi insanlara mənzillərin onlara məxsus olduğunu deyib, bəzi mənzilləri satıb və binada yaşayan bəzi sakinləri məhkəməyə verib. Hazırda 6-7 mənzillə bağlı məhkəmə prosesi də davam edir. Sakinlər isə düşdükləri bu bataqlıqdan səbirsizliklə qurtulacağı günü gözləyirlər.
Şikayətçi binanın plan-sxemə uyğun olmayan şəkildə tikilməsini də söyləyib. Belə ki, bina 12 mərtəbəli tikilməli olduğu halda sonda 14 mərtəbəli olub. Bu məqamda da şirkət rəhbərləri qanunu pozaraq, vətəndaşların gələcək durumunu - onları hansı problemlər qarşısında qoya biləcəklərini düşünməyərək acgözlük göstəriblər... Binanın da təhvil verilməməsinin əsas səbəblərindən biri - bəlkə də birincisi elə budur.

"Əmlak Bazarı İştirakçıları” Birliyinin sədri Ramil Osmanlı deyir ki, problemlərin kökündə mənzil mülkiyyətçilərinin müştərək cəmiyyətlərinin yaradılması durur. R.Osmanlı yeni tikilən hündürmərtəbəli binalarda bu sahədə boşluq olduğu qənaətindədir: "Yəni Mənzil Tikinti Kooperativləri mülkiyyətçilərinin mövcud hüquqi sənədləri – çıxarışları olmadığına görə bu məsələlərdə şəxsi istəklərinə uyğun olaraq hərəkət edirlər. Düşünürəm bu binaların sənədləşdirilməsi bu problemin həll olunmasına gətirib çıxara bilər. Mülkiyyətçilər o binaları özləri idarə etmək məsələsini ortaya qoya bilərlər və ümumi yığıncaqlar çağırarlar. Bunun üçün zəruridir ki, ilkin mülkiyyət sənədlərinə malik olsunlar.”