Sumqayıt şəhərinin 9 mikrorayon ərazisində bir neçə binanın sakinləri həyətə axan və zirzəmilərə dolan kanalizasiya sularından şikayətçidirlər.
Onlar deyir ki, bu problem bir müddətdir davam edir və üfunət qoxusundan həyətə çıxmaq mümkünsüz hala gəlib.
Çirkab suları binaların zirzəmilərinə dolur, binaların bloklarına daxil olanda pis qoxudan dayanmaq mümkün deyil.
Hətta bəzi binaların liftlərinə daxil olanda da üfunət qoxusu hiss edilir.
Sakinlər deyir ki, bu gün çirkab sularının axması dayanıb, amma qoxu hələ də qalmaqdadır.
Bəzi binlarda isə çirkab sularının zirzəmilərə dolması uzun müddətdir ki, baş verir.
Sakinlərin sözlərinə görə problem ərazidəki boruların dəyişməməsindən yaranır. Qəzalar baş verəndə borular təmir edilib, indi isə bu borulardan küçələrə su axır.
28-ci binanın sakinləri isə həm həyətə axan kanalizasiya sualarından, həm də binadakı su təchizatından şikayətçidir. Onlar deyir ki, gündüz saatlarında su az gəlir.
Sakinlər çirkab sularının içməli suya da qarışması ehtimalından narahatdırlar.
Onlardan bəziləri su üçün filtr də alıb ki, içdikləri suyun çirkli olmamasından əmin olsunlar.
Məsələ ilə bağlı Azərsu ASC-dən şərh almaq mümkün olmayıb.
Amma Sumqayıt Şəhər İcra Hakimiyyətindən bildirdilər ki, məsələdən xəbərdardılar və ərazidə Azərsu ASC tərəfindən iş aparılır.
Xəbərdən istifadə edərkən istinad etmək vacibdir.
