Vətən Müharibəsinə qatılan Səmid 3 bacının 12 ildən sonra dünyaya gələn tək qardaşı idi. 1998-ci il 5 iyunda Sumqayıtda anadan olan Səmid Corat qəsəbəsində 7 saylı tam orta məktəbi bitirib. 2016-cı ilin iyunundan Beyləqan rayonunda N saylı hərbi hissədə həqiqi hərbi xidmətdə olub. Sentyabr ayının 27-də, müharibə başlayanda səfərbərliklə cəbhəyə çağırılıb. Anası Lamiyə Əliyeva deyir ki, səfərbərliklə çağırış gələndə Səmid sevindi, dedi ki, nəhayət dədə-baba torpaqlarımızın düşmən tapdağından azad olacağı zaman yetişdi. Elə həmin gün Səfərbərlik və Hərbi Çağırış üzrə Dövlət Xidmətinin Sumqayıt şəhər bölməsinə müraciət etdi və cəbhəyə yollanıb. Müharibənin ilk günlərində Horadiz, Füzuli istiqamətində döyüşlərdə iştrak edib. Oktyabrın 1-də də elə Füzulidə şəhid olub. Rabitəçi olan Səmid ailəsiylə sonuncu dəfə sentyabr ayının 29-u danışıb. Çox qısa, lakin şərəfli döyüş yolu keçərək Şəhidlik zirvəsinə ucalan Səmidin anasının indi bircə arzusu var. Lamiyə xanım istəyir ki, Səmidlə eyni ərazilərdə döyüşən silahdaşları ailəylə əlaqə saxlasınlar. Ailənin Səmidin keçdiyi döyüş yolu, necə şəhid olması haqda heç bir məlumatı yoxdur.

Səmidin bacıları da qardaşlarının cəsur olduğunu bildirirlər. "Qorxmurdu, heç nədən qorxmurdu, çəkinmirdi. Müharibəyə də könüllü getdi. Çox cəsarətli olub, qorxmaz olub, igid olub. Torpağı uğrunda öz canını verməyə hazır olub. Şəhid bacısı olmaq çox çətindir, amma biz çox fəxr edirik ki, qardaşımız Vətən uğrunda şəhid olub. Sağ olsun bizim Ali Baş Komandan, yaşasın Azərbaycan xalqı, var olsun bizim ordumuz. Bizim oğlumuzun qanını yerdə qoymadılar. Ümumiyyətlə, şəhidlərin heç birinin qanı yerdə qalmadı. Var olsun Vətənimiz”.

Səmid anası Lamiyə xanımla hər dəfə danışanda ona "Vətən bizə əmanət! Torpaqlarımızı azad edib evə üzüağ, qəhrəman kimi qayıdacağam”, - deyib. Anası deyir ki, cəbhədən evə zəng edəndə Səmid gülə-gülə danışardı. Mənə də deyərdi ki, rabitəçilər öndə olmur, arxadayıq biz, narahat olmayın. Atışma səslərini, təcili tibbi yardım maşınlarının səslərini eşidirdim, mənə deyirdi, narahat olma, onlar da təlim keçir. Biz olduğumuz yerdə müharibə getmir. Qohumları arasında da xüsusi hörməti ilə seçilirdi Səmid: "Səmidin bütün qohum-əqrəba arasında xüsusi bir yeri var idi. Çox zəhmətkeş, hörmətli uşaq idi. Az yaşı olmasına baxmayaraq, hamının hörmətini qazanmışdı. Torpağa bağlı uşaq idi, vətənini çox sevirdi. Öz xalası qızına da nişanlı olub. Qismət olsaydı, bu ilin mart ayında Səmidin toyu olacaqdı”.

Şəhid əsgər Səmid Əliyev ölümündən sonra "Vətən uğrunda” və "Füzulinin azad olunmasına görə” medalları ilə təltif edilib.

Xədicə Səxavətqızı

Xeberle.com