Məsələ ilə bağlı stadionun direktoru Nadir Quliyevlə əlaqə saxladıq. N. QuliyevXeberle.com-a açıqlamasında tikinti işlərinin dayandırılmadığını və maliyyə ilə bağlı çətinliklərin olduğunu qeyd edib: "Bu il üçün stadionun tikintisinə ayrılan vəsaiti bankdan götürə bilmədiyimizdən müəyyən çətinliklər yaranıb. Yaxın vaxtlarda tikintiyə qaldığımız yerdən davam edəcəyik.

Qeyd edək ki, geridə qalan müddətdə arenada yetərincə böyük işlər görülüb. 16 min azarkeş tutumuna malik arenanın tribunaları hazırdır və üstləri də örtülüb. Bundan başqa, ofis və idman zalları üçün nəzərdə tutulan, 4 mərtəbədən ibarət inzibati binanın tikintisi yekunlaşıb. Bu ilin yayında təhvil verilməsi gözlənilən stadionun drenaj və kanalizasiya sisteminin yenilənməsinə start verilib.

Xatırladaq ki, 2019-cu ilin noyabrında Mehdi Hüseynzadə adına Sumqayıt şəhər stadionunun yenidən qurulması məqsədilə Azərbaycan Respublikası Prezidentinin ehtiyat fondundan Sumqayıt Şəhər İcra Hakimiyyətinə ilkin olaraq 5 milyon manat ayrılıb.

1966-cı ildən fəaliyyət göstərən stadion indiyə qədər heç vaxt əsaslı təmir olunmayıb.

Xədicə Səxavətqızı

Xeberle.com