Sumqayıt şəhərində 1995-ci il təvəllüdlü Samir iş yoldaşı Elgünə xəsarət yetirib.
Xeberle.com xəbər verir ki, teleqraf.com-un əldə etdiyi məlumata görə, hadisə 16 aprel 2021-ci ildə "Kimya Sənaye Parkı” ərazisində yerləşən "Aminol” sürtgü yağları zavodundakı anbarın qarşısında baş verib.
İş yoldaşı Elgünün onun ünvanına nalayiq söyüşlər söyməsi səbəbindən Samir onunla mübahisə edib. Mübahisə zamanı Elgünü divar kağızı kəsən bıçaqla Samirin boyun nahiyyəsindən vurub.
İstintaq orqanı tərəfindən Samirin barəsində Cinayət Məcəlləsinin 128-ci (qəsdən sağlamlığa yüngül xəsarət yetirmə) maddəsi ilə ittiham elan eidlib.
Cinayət işi üzrə təqsirləndirilən şəxs qismində ifadə verən Samir bildirib ki, 2020-ci ilin sentyabrından etibarən Sumqayıt Kimya Sənaye parkında yerləşən "Aminol” sürtgü yağları zavodunda fəhlə işləyir: "Elgünü zavodda işlədiyim vaxtlardan tanıyıram, iş yoldaşım olub. Aramızda qohumluq əlaqəsi yoxdur. Münasibətlərimiz yaxşı olub”.
Təqsirləndirilən şəxsin sözlərinə görə, aprelin 14-də saat təxminən 11-12 radələrində anbarın qarşısında yük avtomobilindən Nicat və Eminlə yük boşaldan zaman Elgün onlara yaxınlaşıb: "Elgün söyüş söyərək bildirdi ki, kimsə ondan müdiriyyətə şikayət edib. Elgün Nicatın ünvanına söyüş söydü. Elgünə söyüş söyməməsini dedim. Bu dəfə məni söydü. Əlimin içi ilə onun sifətinin sol tərəfinə zərbə vurdum.
Eminlə Nicat araya girərək bizi dalaşmağa qoymadılar. Bundan sonra anbara gəldik. Həmin gün gecə Elgün zəng etdi, görüşmək istədiyini dedi. Səhər işdə görüşüb, söhbət edə biləcəyimi dedim”.
Samir deyib ki, növbəti günlərdə də Elgün ona zəng edib: "Görüşmək istədiyini desə də, ona əhəmiyyət vermədim. Aprelin 16-da saat 13 radələrində zavodun yeməkxanasından çıxdım, zavoda tərəf getdim. İş yoldaşım Emin də mənimlə birlikdə idi. Hələ yeməyə gedəndə Elgün məni zavodun girişindəki mühafizə otağında gözləyirdi. Başa düşdüm ki, mənimlə dalaşmaq istəyir. Bunu Eminə də dedim. Emin məni anbara apardı və qapını arxadan bağladı ki, mübahisə olmasın.
Anbara girəndən 1-2 dəqiqə sonra Elgün anbarın qapısını döydü. Emindən qapını açmasını xahiş etdim. Biz qapını açmaq istəməsək də, Elgün ünvanıma söyüş söydüyündən məcbur qaldım, qapını açdım.
Qapını açdıqda Elgün içəri girmək istədi. Emin buna imkan vermədi. Anbardan çölə çıxdıq. Elgün niyə qardaşıma mobil telefon nömrəsini verdiyimi soruşdu. Bildirdim ki, qardaşına nömrə verməmişəm, qardaşını tanımıram və onunla danışmamışam. Sadəcə iş yoldaşımız Məhəmməd mənə dedi ki, Elgünün qardaşı nömrəmi istəyir. Mən də Məhəmmədə nömrəmi verdim ki, qardaşı ürəyi istəsə, mənə zəng etsin, lazım olsa görüşək.
Sözümü qurtararaq getmək istədim. Bu zaman Elgün əli ilə yaxamdan tutdu, məni söydü. Əsəblərimi cilovalaya bilmədim, əlimdə olan divar kağızı kəsən bıçaqla (rezakla) Elgünün boynunun arxa nahiyəsinə bir dəfə zərbə vurdum. Bundan sonra Emin və sonradan oraya gələn Məhəmməd bizi ayırdılar. Elgün boyununu tutaraq müdriyyətin otağına tərəf getdi. Müdriyyət də hadisə ilə əlaqədar olaraq hər ikimizi işdən müvəqqəti olaraq uzaqlaşdırdı”.
Təqsirləndirilən şəxs bildirib ki, sonradan Elgünün hadisə ilə bağlı polisə şikayət etdiyini bilib.
Cinayət işi üzrə zərərçəkmiş şəxs qismində ifadə verən Elgünün sözlərinə görə, 2018-ci ilin iyulundan 2021-ci ilin aprelinədək Sumqayıt Kimya Sənayə parkında yerləşən "Aminol” sürtgü yağları zavodunda sürücü işləyib: "Aprelin 14-də, müdirinin mənə qarşı münasibətinin dəyişdiyini hiss etdim. Anbarda işləyən Nicata iş yoldaşlarım Samir və Eminin yanında dedim ki, məndən müdirə kim şikayət edib.
Bu sözü bir qədər kobud şəkildə, yəni söyüşlə dediyim üçün Samir qəflətən yumruqla sifətimə zərbə vurdu. İş yoldaşlarımız bizi ayırdılar. Samirə işdən kənara çıxıb, söhbətimizi çöldə etməyi bildirdim. Samir bundan imtina etdi. Bu söhbətin üstünə çox getmədim”.
Zərərçəkmiş deyib ki, aprelin 16-da işdə olduğu zaman iş yoldaşı Məhəmməd Samirin onu vurması barədə danışdığını deyib: "Məhəmmədə heç nə demədim. Saat 13 radələrində zavodun girişində mühafizə otağında olduğum zaman Samirlə Eminin zavodun anbarına girmələrini gördüm. Onların arxasınca getdim, anbara yaxınlaşdım və qapını döydüm.
Emin qapını açanda girişdə Samirə iradımı bildirdim. Niyə orda-burda məni vurduğunu danışdığını soruşdum. Ona yaxşı oğlan olmadığını dedim. Samir cibindən aboy bıçağı çıxardı, mənə hədə-qorxu gəldi. Bir-birimizin yaxasından tutan zaman Samir həmin bıçaqla boynumun arxa tərəfinə bir dəfə zərbə vurdu. Boynumdan qan gəlməyə başladı. Otaqda olan Məhəmməd və Emin bizi ayırdılar”.
Elgün qeyd edib ki, dərhal müdiriyyətə yaxınlaşıb: "Zavodun direktor müavini Əlibəy Əlibəyliyə hadisə barədə məlumat verdim. O, işdə mübahisə etdiyimə görə mənim işdən azad olunduğumu bildirdi, məni zavodun ərazisindən çölə çıxartdı. Əlibəyə polisə zəng edəcəyimi dedim. O da "kimə istəyirsən zəng elə, ona heç kim heç nə edə bilməz" dedi.
Məcbur qalaraq Daxili İşlər Nazirliyinin 102 xidmətinə zəng etdim, hadisə barədə məlumat verdim. Sonra isə 103 xidmətinə zəng etdim, mənə ilkin tibbi yardım göstərilməsi üçün Təcili Tibbi yardım çağırdım. Təcili Tibbi yardım avtomobili gəldi və məni Sumqayıt şəhər Təcili Tibbi Yardım Xəstəxanasına apardı. İlkin tibbi yardımdan sonra evə buraxıldım.
Sumqayıt şəhər Polis İdarəsinin 2-ci polis bölməsindən zəng edib, məni bölməyə dəvət etdilər. Polis bölməsində hadisə ilə bağlı ərizə və izahat yazdım”.
Bu cinayət işinə Sumqayıt şəhər Məhkəməsində baxılıb.
Samirin barəsində Milli Məclisinin "8 Noyabr–Zəfər Günü münasibətilə amnistiya elan edilməsi haqqında” 5 moyabr 2021-ci il tarixli Qərarının 1.16-cı və 9.1-ci bəndləri tətbiq edilib. O,cinayət məsuliyyətindən azad edilib və barəsində olan iş üzrə icraata xitam verilib.
Samirin barəsində seçilmiş "başqa yerə getməmək haqqında iltizam” qətimkan tədbiri ləğv edilib.
Xəbərdən istifadə edərkən istinad etmək vacibdir.
