Xeberle.com-un məlumatına görə, M.Seyidova redaksiyamıza şikayət məktubu ünvanlayaraq bildirib ki, ailənin tək övladı olan Azərbaycan Neft və Kimya İnstitutunun məzunu Ruslan Seyidov 1993-cü il 13 dekabr tarixində 32 yaşında Beyləqan istiqamətində gedən döyüşlərdə  qəhrəmancasına şəhid olub. 

Ruslan Seyidov Sumqayıtın Şəhidlər Xiyabanında dəfn olunub.

Şikayət məktubunda deyilir:

"Hörmətli redaksiya, mən Sumqayıt sakini, Minarə Seyidova şəhid Seyidov Ruslan Yusif oğlunun həyat yoldaşıyam. Mətbuata müraciət etməyimin səbəbi 29 ildir ki, şəhid ailəsi olaraq bizə laqeyd və etinasız münasibətdir. Həyat yoldaşım şəhid olandan sonra ailənin bütün qayğı və ehtiyacları mənim üzərimə düşüb.

29 il ərzində mən birdəfəlik 11 000 manat sığorta ödənişindən və şəhid ailəsinə verilən təqaüddən savayı qanunla şəhid ailələri üçün nəzərdə tutulmuş heç bir imtiyazdan və güzəştdən istifadə etməmişəm.

1993-cü ildən indiyədək 1-2 tədbirə dəvəti, bayramları, əlamətdar günləri istisna etməklə, demək olar ki, heç bir rəsmi qurumdan qapımı döyməyiblər, ailə şəraitimlə, sosial vəziyyətimlə maraqlanmayıblar. Sanki heç belə bir şəhid ailəsi yoxdur.

İndi isə çoxlu sayda müraciət etsəm də, bizə fərdi yaşıyış yeri tikmək üçün nə torpaq sahəsi verilib, nə (mənə düşsə də, şəhid ailəsinin yaşayış sahəsi ilə təmin edilməsi haqda qüvvədə olan qanunvericiliyə müvafiq olaraq) mənzillə təmin olunmuşam, nə də övladlarım ixtisasına uyğun işlə təmin olunub.

Bu müraciətlərə cavab olaraq Sumqayıt şəhər İcra Hakimiyyətindən uzağı ofisant və satıcı kimi iş yerləri təklif olunub.

Şəhid ailəsi olaraq nəinki evlə təmin olunmamışıq, bizi indiyədək mənzil almaq üçün heç qeydiyyata da salmayıblar, növbəyə belə götürməyiblər.

Hələ üstəlik mənə deyilb ki, "sənə mənzil düşmür, hələ sizin mənzil sahəniz artıqdır 7 kv m2. Halbuki cəmi 28 m2  sahəli evdə 4 nəfər qeydiyyatdadır və mənzil şəraitimizin yaxşılaşdırmasına ehtiyacımız var. Sumqayıt şəhər İcra Hakimiyyətinin nəzdindəki mənzil təsərrüfatı və mənzillərin qeydiyyatı şöbəsinin müdiri Sədaqət Əsədovaya dəfələrlə şəhid ailəsi olaraq evlə təmin olunmağımızla müraciət etmişəm, amma müsbət olmayıb və indiyədək məndən əlavə sənədlər istənilib".

Sumqayıt Şəhər İcra Hakimiyyətinin sözçüsü Eyvaz Qocayev məsələ ilə bağlı sualımıza cavab olaraq bildirdi ki Sumqayıt şəhərində torpaqlarımızın işğaldan azad edilməsi uğrunda gedən döyüşlər zamanı şəhid olmuş hərbçilərimizin ailələri diqqət mərkəzində saxlanılır: "Sumqayıt Şəhər İcra Hakimiyyətinin əməkdaşları Seyidov Ruslan Yusif oğlunun həyat yoldaşı Minarə Seyidova ilə görüşülüb və qanunvericilikdə nəzərdə tutulan sənədlərin siyahısı ona təqdim olunub. Sənədləri hazırlayaraq Sumqayıt Şəhər İcra Hakimiyyətinə təqdim etdikdən sonra ailnin mənzil növbəsinə qəbul olunması məsələsinə baxılacaq”.