Sumqayıt Apellyasiya Məhkəməsində Nazir Vahabovun (soyadlar şərtidir) barəsindəki hökmdən verilən apellyasiya şikayətinə baxılıb.
Xeberle.com-un əldə etdiyi məlumata görə, hakim Elman Əhmədovun sədrliyi ilə keçirilən prosesdə qərar elan olunub.
Qərara əsasən, onun şikayəti təmin edilməyib.
Sumqayıt Ağır Cinayətlər Məhkəməsinin hökmü ilə o, 11 il 3 ay müddətinə azadlıqdan məhrumetmə cəzasına məhkum edilib.
İttihama görə, 1970-ci il təvəllüdlü Nazir Vahabov sinif yoldaşı olan Eydur Novzurbəyovu çoxsaylı bıçaq zərbələri ilə qətlə yetirməyə cəhd edib.
Onun barəsində Cinayət Məcəlləsinin 29, 120.2.2 və 29, 120.2.4-cü (xuliqanlıq niyyətilə və xüsusi amansızlıqla adam öldürməyə cəhd) maddələri ilə ittiham irəli sürülüb.
Belə ki, Nazir hadisə baş verən gün qonşusunun qızının toyunda iştirak edib. O, toyda sinif yoldaşı və qızının keçmiş həyat yoldaşının əmisi olan Eydurla oynamaq üstündə dalaşıb. Daha sonra Eydur şadlıq evindən kənarlaşdırılıb. Toy başa çatandan sonra həmin gün hər iki şəxs yaşadıqları küçədə qarşılaşıblar və yenidən sərxoş vəziyyətdə dalaşıblar. Bu zaman Nazir evə qaçaraq bıçaq götürüb və küçəyə çıxaraq ailə üzvlərinin gözü qarşısında Eydura çoxsaylı xəsarətlər yetirib.
Xəbərdən istifadə edərkən istinad etmək vacibdir.
