Bu barədə Ölkə.Az saytının redaksiyasına izahata çağırılan keçmiş tələbə məktub ünvanlayıb.
Məktubda bildirilir ki, "Gəncə şəhərində yerləşən Azərbaycan Texnologiya Universitetində 2012-ci ildən başlayaraq, 2010-2014-cü il tarixlərində universitetdə ödənişli əsasla təhsil alan tələbələrin adlarına "Kapital Bank"dan saxta təqaüd kartları əldə edilib. 2010-2014-cü il ərzində hər ay həmin kartlara təqaüdlər köçürülüb və tələbələrdən xəbərsiz kartlardan çıxarılıb.
Həmin dövr ərzində qeyd edilən kartlara orta hesabla hər bir tələbə üçün 600-2000 manatadək təqaüd köçürüldüyü üzə çıxıb. Həmçinin müəllimlərin hesablarına artıq maaş köçürülüb, lakin müəllimlər həmin məbləği əldə edə bilməyiblər. 1 il ərzində 1 müəllimə 1000-3000 manat artıq əmək haqqı yazılıb".
Məktubda o da bildirilir ki, indi də adlarına artıq pul köçürülən müəllimləri və həmçinin 2012, 2013 və 2014-cü illərin məzunu olmuş keçmiş tələbələri universitetə izahat verməyə çağırıblar.
Universitetin rektoru Akif Süleymanov isə "yox çıxıb".
Məktubdan sonra isə daha bir maraqlı sual da yaranır:
"Kapital Bank" bu təqaüd kartlarının verilməsinə necə razılıq verib?
Qeyd edək ki, əldə etdiyimiz son məlumata görə Hal-hazirda Azərbaycan Respublikasının Baş prokuroru yanında Korrupsiyaya qarşı mübarizə idarəsi müstəntiq Rəşad Məmmədlinin nəzartəti altında universitedə yoxlamalar aparır.
Xəbərdən istifadə edərkən istinad etmək vacibdir.
