Ötən ilin bu günü hamımızın panika ilə xəbərlərini gözlədiyimiz o məşum gündən düz 1 il ötür. Bəzilərimiz üçün sevinclə, fərəhlə xatirələrdə donan 1il, həmin binanın sakinləri, o acını yaşayan insanlar üçün kabusa çevrildi.
İllərlə, min bir əzab-əziyyətlə qurduqları yuva bir andaca, gözlərinin önündəcə külə döndü. O yanğında cansız bədənləri qalan  körpələr kimi... Valideynlərinin doyunca qoxulamadığı, sevincinə doymadığı, ürəyincə fərəhlənə bilmədiyi körpələr...
3 yaşlı Fərəh Məhərrəmova, 5 yaşlı Ayan Kərimova, 1 yaş 6 aylıq Ömər Cavadov, 2 yaşlı Ayxan Hüseynovun valideynləri kimi...Əlbəttə, zaman keçdi, xəsarət alanlar sağaldı, yararsız evlər təmir edildi, bəziləri əvvəlkindən də gözəl mebellər, ev avadanlıqları ilə təmin olundular. Hadisəyə görə cinayət işi açıldı, həbslər oldu, yanğına səbəb lənətə gəlmiş "poliuretan”i də söküb atdılar, bircə itirilən əzizləri qaytara bilmədilər...
Ümumilikdə 15 nəfərin öldüyü, 50 nəfərin xəsarət aldığı faciə bəzi ailələrin ömür çırağını əbədi söndürdü.
Çünki, heç bir maddiyyat, bahalı avadanlıq, heç bir kompensasiya ilə geri dönüşü olmayan itkiləri əvəz edə bilmədilər...
modern.az