Arzunun atası Sənan Qurbanlı Facebook profilində qızının ölümündə ittiham etdiyi həkimin fotosunu paylaşıb.

O, sosial hesabında bunları yazıb: 

"Bu da qızımı əməliyyat edən "məşhur" həkim İlham Ağayev. Hər yerdə deyir ki, mənim günahım yoxdur. Bəs günah kimdədir? Ay millət burun-boğaz əməliyyatından adam ölərmi? Siz deyin, bəlkə mən savadsızam? Qızımın dünyasını dəyişməsində qusmasını səbəb göstərirlər. Tutaq ki, övladım qusub, amma orada kimsə olmalıydı ya yox? Qızımın ölümündə günahkar olanlar var. Amma  mən heç kimi tanımıram. Qızımı İlham Ağayevə verib ordan çıxmışam. O isə mənə qızımın cənazəsini qaytardı."

Xatırladaq ki, Səhiyyə Nazirliyinin Məhkəmə -Tibbi Ekspertiza və Patoloji Anatomiya Birliyi 3 yaşlı Arzu Qurbanlının aspirasiya, mədə möhdəviyyatı səbəbindən vəfat etdiyini açıqlayıb.
Bildirilib ki, damaq badamcıqlarından əməliyyat olunan uşaqda sonradan qusma olub, nəticədə qusuntu kütlələri udulub. Qusma zamanı kütlələr uşağın tənəffüs yollarına gedib və uşaq bundan dünyasını dəyişib. Meyitin ekspertizası zamanı onun traxeya və bronxları qusuntu kütləsi, mədə möhdəviyyatı ilə dolu olub. Körpə bunun nəticəsində vəfat edib.
Uşağın atası Sənan Qurbanlı isə ekspertizanın rəyinin açıqlanması barədə xəbərin doğru olmadığını deyib: "Mən də bu barədə məlumatı oxuyandan sonra Sumqayıt şəhər Prokurorluğunda oldum, artıq ehtiyatsızlıqdan adam öldürmə maddəsilə cinayət işi açılıb və işi müstəntiq Əflatun Hüseynov aparır. Prokurorluqdan mənə ekspertizanın rəyinin hələ çıxmadığını, çıxan kimi təqdim edəcəklərini söylədilər. Müstəntiq onu da dedi ki, şəhər prokuroru Sərdar İmanov bu məsələyə şəxsən özü nəzarət edir, bilmirəm, bəlkə məni sakitləşdirir, ancaq mənimlə səmimi danışdılar".
3 yaşlı A. Qurbanlı iyunun 30-da Sumqayıtda "Real" Tibb Mərkəzində burun-boğaz əməliyyatı olunub. A. Qurbanlı əməliyyatdan bir neçə saat sonra dünyasını dəyişib.
Xeberle.com