"Sentyabrın 6-da 9 nömrəli marşruta mindim. Basabasıydı. Elə qapının ağzındaca dayandım. Əlimdə iki sellofan paket, bir də əl çantam varıydı. Bir nəfər şəxs özünü çox şübhəli aparırdı. Hündürboy, arıq oğlanıydı. Elə sürücünün yanında dayanmışdım. Oğlan dedi ki, düşürəm, sürücü də saxladı. Sonra elə oldu ki düşmədi. Mənə zəng gəldi telefonu götürdüm istədim cavab verəm. Oğlumuydu. Adboy verib təzədən yığmaq istədim. O anda marşrut avtobus birdən silkələndi. Hiss elədim ki, oğlan nəsə mənə dəydi. 9-cu mikrorayonda ''Sum'' marketin yanında dedi ki, saxla düşürəm. O düşdü, mən də nəsə narahat oldum. Çantama əl atdım, gördüm pul kisəm yoxdur. Elə o andaca sürücüyə dedim ki, oğlan pul kisəmi götürdü. Dedi görmədim axı. Amma hiss elədim ki, o da güzgüdən görürdü. 12-ci mikrorayonda düşməliydim. Avtobusdakı qadınlar dedilər ki, burda polis bölməsi var qaç ora. Getdim bölməyə, hadisəni danışdım. Çox həyəcanlı idim, dedim hadisə avtobus Heydər park tərəfdən keçəndə olub. Amma dəqiq deməliymişəm. Nəsə ordan göndərdilər 3-cü bölməyə. Hadisəni danışdım, onlar dedilər ərazi bizim deyil. Təzədən gətirdilər 1-ci bölməyə. Burada ərizəmi aldılar dedilər ki, məktub vasitəsilə göndərəcəyik 3-cü bölməyə. Sentyabrın 7-də axşam iki nəfər qapımızı döydü. Pul kisəmi, şəxsiyyət vəsiqəsi, tibbi sağlamlıq kartımı gətirdilər. Dedilər ki, Gənclik marketin yanındakı binada qalırıq, 9-cu mikrorayonda. Uşaq tapıb, biz də gətirdik. Sabahı - ayın 8-də 102-yə zəng edib dedim ki, pul kisəmi gətirdilər, amma boş. Hadisəni onlar da qeyd elədilər. 15 dəqiqədən sonra 3-cü bölmədən zəng gəldi ki, ərizə nə vaxt yazılıb? Mən də olduğu kimi dedim. Ayın 11-də gəldilər izahat aldılar. Əməliyyat qrupu ilə getdik hadisə yerinə. Fikirləşdim ki, nəhayət, artıq başlıyarlar əmliyyata... Amma bu gün yenə zəng ediblər ki, sizin işiniz 1-ci bölməlikdir. Hətta avtobusu idarə edən həmin sürücünü də göstərdim onlara ki, tapmaq rahat olsun cibgiri. Bircə o qalmışdı ki, qulağından tutub cibgirin özünü bölməyə gətirim. Polis nə üçündür, başım çıxmır?! O bunun üstünə göndərir, bu onun. Bu qədər.

İnanın, yandığımdan bilmirəm neyləyim! Sizə inanıram ki, paylaşıb bu hadisəni necəsə kömək edəsiniz. Zülmlə qazandığım 400 manat pul da havaya getdi. İndi belə çıxır ki, istənilən vaxt küçədə, parkda, ictimai nəqliyyatda belə hadisələr baş verəcək və sabahı da üstü örtülüb unutdurulacaq?"

Hadisəylə bağlı Sumqayıt polisinin də mövqeyini işıqlandırmağa hazırıq.