Xeberle.com portalının avropa.info-ya istinadən məlumatına görə, Sumqayıt şəhərində 9 saylı orta məktəbin 11-ci sinif şagirdi olan qızı qaçırıblar. Hadisə bu gün - bir neçə saat bundan öncə məktəbdə baş verib. Xəbərdə həmçinin qeyd olunur ki, baş verən hadisə ilə bağlı 9 saylı məktəbin direktoru Bəhruz Səlimxanov Sumqayıt şəhər Polis İdarəsinə aparılıb.

Məsələylə bağlı Bəhruz Səlimxanovla əlaqə saxladıq. Məktəbin direktoru Xeberle.com-a belə bir faktın olduğunu təsdiqləyib. Lakin o, hadisənin məktəbdə deyil, dərs bitəndən sonra - çöldə baş verdiyini deyib. B.Səlimxanov hadisəylə bağlı Sumqayıt şəhər Polis İdarəsinə aparılması ilə bağlı yayılan məlumatları isə təkzib edib: "Belə bir hadisə olub. Amma dərs bitəndən sonra. Həmin şagird məktəbdən çıxandan sonra qaçırılıb. Qaçırılan qız 11-ci sinif şagirdi Məleykə Fərəclidir. Mənim polisə aparılmağımla bağlı məlumat isə tamamilə yalandır. Hazırda iş başındayam'', - deyə direktor bildirib.