AzTV-nin əməkdaşı Lamiyə Quliyevanı idarə etdiyi avtomobil ilə vurub öldürən Xamis Ağcayev özü də tanınmış şəxsdir.
Xeberle.com-un Qafqazinfo-ya istinadən verdiyi xəbərə görə, qəzanı törədən X.Ağcayev "SOY” prodakşının rejissor köməkçisidir. O, bundan əvvəl müğənni Sevda Yəhyayeva və Rahidə Baxışovanın prodüseri olub.
"SOY” prodakşının rəhbəri Oqtay Əliyev məlumatı təsdiqləyib. O bildirib ki, X.Ağcayev dünən elə hadisə yerindəcə polis əməkdaşları tərəfindən saxlanılaraq bölməyə aparılıb.
Hadisə dünən axşam saatlarında Parlament prospektində baş verib. İşdən çıxan Lamiyə Quliyeva prospektdə piyada keçidi ilə yolu keçərkən Bakı şəhər sakini Xamis Ağcayevin idarə etdiyi "Mercedes” markalı avtomobil vurub. Xəsarət alan Lamiyə Quliyeva xəstəxanaya yerləşdirilib. Həkimlərin səylərinə baxmayaraq, onun həyatını xilas etmək mümkün olmayıb.
Qeyd edək ki, 38 yaşlı Lamiyə Quliyeva dövlət televiziyasında suflyor mütəxəssisi işləyirdi.

Xəbərdən istifadə edərkən istinad etmək vacibdir.