"Yazıb Sizə bildirirəm ki, ana kimi böyüdüb başa çatdırdığım doğma bacım Sumqayıt şəhər sakini Əkbərova Gülnarə Təyyar qızı 08.05.2017-ci il tarixində saat 17 radələrində 40-41 həftəlik hamiləliklə, Sumqayıt şəhər 1 saylı doğum evinə daxil olub saat 23 radələrində 3600 qr çəkidə diri oğlan uşağı doğmuş, doğuşu tutan həkim Yeganə Muradzadə həkim peşəkarlığına uyğun doğuşu düzgün qəbul etmədiyindən doğuş zamanı bacımda uşaqlıq yolunun cırığı baş vermiş, ana yeni doğulmuş körpəsi ilə birlikdə 3-4 saat həkim nəzarətindən kənarda qaldığından 09.05.2017-ci il tarixə keçən gecə uşaqlıq yolunun qanaxmasından, diri doğulmuş körpə isə oksigen çatışmazlığından ölüblər. Bacım Gülnarə Əkbərova 3-cü doğuş keçirmiş, əvvəlki doğuşları normal olmaqla uşaqları salamatdır. İstər hamiləlikdən əvvəl, istərsə də hamiləlik dövründə bacım hər hansı xəstəlik keçirərək müalicə almamışdır, nə də onda ürəklə bağlı problem və qüsur olmamışdır.

 

Səhiyyə Nazirliyinin Məhkəmə-Tibbi Ekspertiza Pataloji Anatomiya Elmi Təcrübi və Tədris Birliyinin mərkəzi ekspertizalar şöbəsinin rəisi Ceyhun Allahverdiyev bacımın doğuş zamanı qanaxmadan, yəni həkim səhvindən, səhlənkarlığından deyil, öz əcəli ilə ürək xəstəliyindən öldüyünü iddia edir. Belə nəticəyə gəlirəm ki, Ceyhun Allahverdiyevin cəhdi yalnız həkim səhvini ört-basdır etməkdən ibarətdir. Əgər bacımın ürəyində qüsur və ya hər hansı xəstəlik olsaydı, 9 ay hamilə olub 3600 qr çəkidə diri oğlan uşağı dünyaya gətirə bilməzdi. Mən qanunlarımızın aliliyinə sığınıram, inanıram ki, Sizin məsələni ictimailəşdirdiyinizdən sonra ekspert obyektiv rəy verəcək. Gedən söhbətlərdən eşidirəm ki, həkim mama-ginekoloq Yeganə Muradzadənin arxalı qohumları var, artıq ekspert ilə işini qurub, onun təqsirsiz olması barədə rəy verəcəkdir. Məhkəmə Tibbi Ekspertiza və Pataloji Anatomiya Elmi Təcrübi və Tədris Birliyinin Mərkəzi Ekspertizalar şöbəsinin rəisi Ceyhun Allahverdiyev qeyri-obyektiv rəy verməklə əyriliklərə getməyə hazırdır və bunu davam etdirir. Qoy Sumqayıt şəhər 1 saylı Doğum Evinin mama-ginekoloqu Yeganə Muradzadənin Ceyhun Allahverdiyev kimi havadarı olsun, amma mənim heç kimim yoxdur, yeganə arxam, dayağım ölkə rəhbərliyi – cənab Prezidentimdir və qüvvədə olan ali qanunlarımızdır. Bu işdə təqsiri olan hər bir tibb işçisi layiqli cəzasını alanadək mən şikayətimdən əl çəkməyəcəm, çünki ölkəmizdə şah qanun deyil, qanun şahdır. Hörmətli prezidentim İlham Əliyev dəfələrlə çıxışlarında vurğulamışdır ki, dövlət qulluqçuları əlçatan olmaqla ciblərinə yox, xalqa xidmət etməlidirlər. Cənab Prezidentin bu məzmunlu çıxışları qeyri-obyektiv rəy verən Birliyin Məhkəmə Ekspertizalar şöbəsinin rəisi Ceyhun Allahverdiyevə hələ çatmayıb.

O, ittihamlarla razılaşmır  və növbəti ekspertizanın təyin olunmalı olduğunu deyir: "Həkim səhlənkarlığı hüquq-mühafizə orqanlarının araşdıracağı işidir.  Bu ekspertizada mən ancaq ölümün səbəbini yazmışam. Qalan məsələlər isə komisyon eksperizanın səlahiyyətinə aiddir.  Siz müstəntiqlə əlaqə saxlayın. Onda ətraflı məlumat var. O, ikinci ekspertiza təyin etməlidir. Və ondan sonra bilinməlidir ki, hansı həkimin səhvi var, hansı həkim hansı dərəcədə məsuliyyət daşıyır? Qarşıya qoyulan suallar ancaq komisyon ekspertizanın səlahiyyətlərinə aiddir.  Bunlar mənə aid deyil.  Mən elə bir rəy verməmişəm. Heç səlahiyyətim də çatmır. İşin davamı komisyon ekspertizada aparılmalıdır. Komisyon ekspertiza şöbəsində. Orda o suallara ətraflı cavab  veriləcək”.