Bu günlərdə Dünya TV Sumqayıtda təmizlik işləri, xüsusən Sumqayıt şəhər Təmizlik Departamentinin fəaliyyəti haqda videomaterial hazırlayıb. Həmin süjetdə həm də deyilir ki, Sumqayıtda 1800-ə yaxın sahibsiz heyvan zərərsizləşdirilərək Sumqayıt Məişət Tullantıları Poliqonuna göndərilib. Bu məsələnin mahiyyətini araşdırdıq.
Sumqayıt şəhər Təmizlik Departamenti MMC-nin baş mühəndisi Ramil Tağıyev Xeberle.com-a açıqlamasında bildirdi ki, küçə heyvanları zərərsizləşdirilərək, Məişət Tullantıları Poliqonuna aparılır.
"Heyvanlar poliqonda hasarlanmış sahədə saxlanılırlar. Şəhərdən nə gedirsə, onunla qidalanır, orda yeyirlər və orda da ömürlərinin sonuna qədər qalırlar. Bu dəqiqə oraya baxılsa, orda nə qədər it var. Təəssüf ki, Sumqayıtın elə şəraiti yoxdur ki, itlər üçün xüsusi yer ayrılsın. Ona görə də, biz heyvanları Bakı - Quba yolunda yerləşən 130 ha-lıq yerə göndəririk".
Baş mühəndis həm də qeyd etdi ki, hazırda orda balalama dövrüdür: "Dünən mən orda olmuşam, itlər nə qədər balalayıblar". Sahibsiz heyvanlara necə baxılması barədə suallarımızı versək belə, R.Tağıyev bildirdi ki, onlardan xəbəri yoxdur.
Məsələ ilə bağlı Xeberle.com-un əməkdaşları əraziyə baxış keçiriblər. Ətraflı müşahidə və baxışdan sonra məlum olub ki, Sumqayıt Məişət Tullantıları Poliqonunda heyvanların saxlanılması üçün xüsusi hasarlanmış sahə mövcud deyil.
Bildiyimiz kimi, Heydər Əliyev Fondunun vitse-prezidenti Leyla Əliyeva sahibsiz heyvanlarla bağlı bir çox təşəbbüslər irəli sürüb. Elə bu təşəbbüslərin nəticəsində yaradılan, özünün təsisçisi olduğu IDEA İctimai Birliyinin nəzdində Heyvanlara Qayğı Mərkəzinin direktoru Surxay Şükürovdan sözügedən mövzu barəsində açıqlama aldıq: "Təbii ki, indi vəziyyət elədir ki, Bakıda, Sumqayıtda, böyük şəhərlərdə, rayonların özündə də minlərlə, bəlkə də on minlərlə sahibsiz heyvanlar var. İtlər isə daha çox problem yaradır. Bakıda vəziyyət elədir ki, İcra Hakimiyyətinin Sahibsiz Heyvanlar üzrə İdarəsi vətəndaşların müraciətləri əsasında əraziyə gələrək, itləri toplayıb, Balaxanıdakı əraziyə buraxırlar. Və orda da zibillik poliqonu var ki, heyvanlar orda qalıb, yemlənirlər. Ancaq, ordakı insanlar şikayətləri ilə məcbur edirlər ki, gəlib itləri götürsünlər. Bəziləri Balaxanıda yayılır, bir qismi də ölür. Sumqayıtdan bizə şikayətlər gəlir ki, burada itləri öldürürlər. Biz buna çox təəssüf edirik. Bu mövzu ilə bağlı indiyə qədər ciddi tədbirlər görülməyib. Biz bir təşkilat olaraq bu işə başlamışıq və ictimai dəstəyimiz də var. Düzdür, çoxlu çətinliklərimiz də var, çünki itlərin sayı həddindən artıq çoxdur. Biz ictimai birlik kimi heyvanlarda axtalanma işlərini aparırıq, çoxalmamaları üçün. Sahibsiz və xəstə itləri pulsuz müalicə edirik. Həm bizə gətirirlər, həm də biz gedib itləri gətiririk. Yəni ki, vəziyyətə uyğun hərəkət eləmək lazımdır. Leyla xanımın şəxsi müdaxiləsindən sonra itlərin güllələnməsinə qadağa qoyuldu. Bu, həm qanunsuz idi, həm də ölkəmizin imicini korlaya bilərdi".
S.Şükürov son olaraq əlavə etdi ki, itlər, pişiklər səbəbsiz aqressiv olmurlar, bunların günahını insanlarda axtarmaq lazımdır: "Təəssüf ki, insanlar da 1 gün ərzində dəyişə bilmirlər. Biz bunun üçün maariflənmə işini aparmağa çalışırıq".
Bəli, bu gün bizdə, cəmiyyətdə sahibsiz heyvanlara münasibət dəyişməlidir. Bunun üçün həqiqətən də İDEA İctimai Birliyinin apardığı təbliğat, gördüyü işlər təqdirəlayiqdir.
Bizim araşdırmamızda isə bir məsələ açıq qaldı, görəsən, Sumqayıt Məişət Tullantıları Poliqonuna aparılan 1800 heyvanın aqibəti necə olub?
Hicranə İsmayılova
Xeberle.com
Xəbərdən istifadə edərkən istinad etmək vacibdir.
