Sumqayıtın “Bizim şəhər” qrupunun solisti, gənc müğənni Elvin Məmmədov dünyasını dəyişib. Bu barədə dünən sabah saatlarında sosial şəbəkələrdə məlumat yayılıb.

 “Damla” qrupunda fəaliyyət göstərən müğənni Mürşüd İsgəndərov gənc müğənninin rəhmətə getməsi haqda öz şəxsi facebook səhifəsində status paylaşmışdı. Xəbəri dəqiqləşdirmək üçün Mürşüd İsgəndərovla əlaqə saxladıq.

O, “Xeberle.com”-a  açıqlamasında bildirdi ki,  “Bizim şəhər” qrupu deyil, Sumqayıt şəhəri bir istedadlı gəncini itirdi: “Ölümündən bir gün əvvəl görüşmüşdük. Deyirdi darıxıram. Özünü yaxşı hiss eləmirdi. Onun qıcolmaları var idi. Görüşəndə də dedi ki, son günlər tez-tez qıcolmaları tutur.”

Qeyd edək ki, Elvin Məmmdov “Bizim şəhər” qrupunun solisti olmaqla yanaşı, həm də son vaxtlar şəxsi təşəbbüsü ilə dini qrup da yaradıbmış.

Xatırladaq ki, Elvin Məmmədov fevral ayının 11-dən 12-nə keçən gecə yatdığı yerdə qıcolma və ürəkgetmədən dünyasını dəyişib. Dünən günorta saatlarında torpağa tapşırılıb. Yaşasaydı gənc müğənni bu il 25 yaşını qeyd edəcəkdi.

Müğənninin sənət yoldaşlarına və ailəsinə Allahdan səbr diləyirik, Allah rəhmət eləsin.

Çinarə Vaqif

Xeberle.com