Az öncə “Qaynar xətt”imizə daxil olan məlumata əsasən, ötən gün Suraxanı Rayon Polis İdarəsində polis işçiləri arasında münaqişə olub. Məlumatı verən şəxsin bildirdiyinə görə, ötən gün saat12:30 radələrində 30-cu bölmənin rəisi Tuncay Abbasov (millət vəkli Aqil Abbasın oğludur) sahə müvəkkilərindən biri - Bağır Səlimov adlı polis mayoru ilə idarədə rastlaşıb. T.Abbas tabeliyində olan ərazidə sahə müvəkkili işləyən Bağırın ondan icazəsiz Suraxanı rayon Polis İdarəsinin rəisinin qəbuluna niyə gəldiyini soruşub və tərəflər arasında münaqişə yaranıb. Vətəndaşın bildirdiyinə görə T.Abbas Bağır Səlimova  zərbələr endirib və o xəstəxanalıq olub.

Məsələ ilə bağlı həmin sahə müvəkkilinin nömrəsini əldə edib onunla əlaqə saxladıq. O, faktı təsdiqlədi və bildirdi ki, belə bir halın olması xoşagələn deyil: “Kimliyindən asılı olmayaraq hamı Azərbaycan vətəndaşıdır. Kiminsə kimisə təhqir və digər zorakı hərəkətlər etməyə haqqı yoxdur. Deyir ki, mən nazirin qucağında böyümüşəm. Mənə kimsə nəsə edə bilməz. Nazirliyə də müraciət etmişəm. Ümidvaram ki, bu məsələ öz obyektiv həllini tapacaqdır ”

Olaya dair Daxili İşlər Nazirliyinin (DİN) Mətbuat xidmətinin şöbə rəisi Orxan Mansuradə isə bildirdi ki, hadisə barəsində məlumatlı deyil: “Belə bir halın baş verməsi barəsində bizdə məlumat yoxdur. Məsələ ilə bağlı araşdırma aparılıb məlumat veriləcək.”

Məsələ ilə  bağlı “Qafqazinfo” T. Abbasovun da mövqeyini öyrənməyə çalışsa da bu mümkün olmayıb.

“Düzdür, eşitdiyimə görə onların aralarında mübahisə olub. Onu danlayıb. Amma o yazılanların biri də həqiqətə uyğun deyil”. Bunu AzNews.az-a millət vəkili Aqil Abbas rəis oğlunun öz işçisini döyməsi barədə yayılan xəbərə münasibət bildirərkən deyib.

Onun sözlərinə görə, iş prosesində belə hadisələr hər gün baş verə bilər: “ İş prosesidir, mübahisə düşməsi normal şeylərdir. Amma döymək məsələsi kökündən yalandır. Mənim oğlum adam döyəndi? Onu yazanlar zəng vurub həmin rayonun polis bölməsindən öyrənə bilərlər.

Xeberle.com