Bu gün Bakı metrosunda sərnişinlər gərgin anlar yaşayıb. Hadisə şahidlərinin ANS PRESS-ə verdikləri məlumata görə, metronun “Həzi Aslanov” metrostansiyası istiqamətində hərəkət edən qatar “Əhmədli” və “Həzi Aslanov” metrostansiyaları arasındakı tuneldə qalıb.

Sərnişinlərin sözlərinə görə, ilk öncə bunu adi hal kimi qəbul etsələr də, sonradan qatarın uzun müddət tuneldə qalması insanları təşvişə salıb.

Facebook-da istifadəçilərdən biri isə yazıb: “Yarım saatdır qatarda qalmışıq, istidən bişirik. Camaatda panika yaranıb. Maşinist 2 dəfə elan edib ki, xətdəki texniki nasazlığa görə ləngiyirik”.

Məsələ ilə bağlı Bakı Metropolitenindən ANS PRESS-ə açıqlama verilib. Açıqlamada bildirilir ki, hadisə qatarın vaqonlarından birində nasazlıq üzündən baş verib.

“Lakin deyildiyi kimi, qatar tuneldə uzun müddət qalmayıb. Qısa vaxt ərzində qatar “Əhmədli” stansiyasında platformaya gəlib. Sərnişinləri çıxarıblar. Qatar depoya göndərilib”, - deyə məlumatda bildirilir.