Mütəxəssislərin əraziyə baxış keçirməsi mütləqdir.
Xaçmazın Xəzər dənizi sahillərinə yaxın meşə ərazisində 6 ədəd insan kəlləsi və sümüklərinin tapılması barədə Xaçmaz rayon İcra Hakimiyyəti aidiyyəti orqanları məlumatlandırıb. İcra hakimiyyətindən İstiPress-in şimal bürosuna verilən məlumata görə, aşkar edilən insan sümüklərinin ermənilər tərəfindən öldürülən dinc insanlara məxsus olması ehtimalı yüksəkdir. Buna görə də Arxeologiya və Etnoqrafiya İnstitutu əməkdaşlarının araşdırma aparması mütləqdir.
Bu gün məzarlığa baş çəkən Xaçmazın Palıdlı kənd orta məktəbinin tarix müəllimi Abdulrəhim Yaqubov da ehtimal edir ki, bu insan kəllə və sümükləri 1918-ci ildə ermənilərin azərbaycanlılara qarşı törətdiyi dəhşətli soyqırıma məruz qalan dinc insanların məzarlığı ola bilər. Abdulrəhim Yaqubov bu ərazidə arxeoloji qazıntıların aparılmasını, arxeoloqların burada işləməsini vacib sayır. Hər halda mütəxəssislər əraziyə baxış keçirəndən sonra konkret söz demək mümkün olacaq.
Qeyd edək ki, insan sümükləri Xaçmazın Müqtədir qəsəbəsi ərazisində təsadüf nəticəsində aşkarlanıb. Meşə massivinin qumluq hissəsindən evin təmiri üçün qum aparan Kiçik Baraxum kənd sakinləri torpaqda insan skeletinin müxtəlif hissələrini görüblər.
Xəbərdən istifadə edərkən istinad etmək vacibdir.
