Belə deyirlər ki, Avropa şəhərlərində hərənin öz yolu var: piyadalar öz yolu ilə gedir, əlillər, velisoped sürənlər və minik avtomobilləri, avtobuslar və yük maşınları da öz yolu ilə gedir. Sumqayıtda isə əksinədir. Hamının bir yolu var, o da yolsuzluqdur. Gördüyünüz bu mənzərə 9-cu mikrorayonda "Şərq" bazarının günbatan tərəfidir. Budur, piyadalar, maşınlar, alanlar, satanlar-hamı, hər şey bu dar bir yolla hərəkət edir. Piyada yolunda isə şıdırğı alver gedir. Piyadaların və sürücülərin normal hərəkət hüququnu tapdalayan bu üzdəniraq yolkəsənlərin təqsiri üzündən hər gün burda onlarla qəza, hüquq pozuntuları və digər xoşagəlməz hallar, hadisələr baş verir. Lakin yolkəsənlərin xəta və cinayətləri yalnız bunlarla yekunlaşmır. Səkiləri zəbt etmiş küçə alverçiləri həm də dövlətin cibinə girir, qazandıqlarını öz himayədarları ilə bölüşür (bu haqda növbəti süjetimizdə -"Küçə ticarətini kimlər himayə edir" sərlövhəli yazıda işıqlandırağacıq) vergidən yayınır, ətrafda ekoloji problem yaratsalar da zibil pulu ödəməkdən, su pulu verməkdən yayınırlar. Bəs onları kim himayə edir? Əlbəttə, xırda yolkəsənlərin arxasında daha böyük yolkəsənlər olmasa, hamı öz yolu ilə gedər və heç bir problem də yaranmaz. Sakinlər də bu fikirdədir. Gəlin onları dinləyək.