Bu gün avtovağzal kompleksi ətrafında nəqliyyat müfəttişlərinin yeni bir zorakılığı qeydə alınıb."Deyerler.org"un hadisə yerində olan əməkdaşının verdiyi xəbərə görə, günorta saatlarında nəqliyyat müfəttişləri bir mersedes markali avtomobilin sürücüsünü vəhşicəsinə döyüblər.

Sürücünün vəziyyəti çox pis olduğundan onu təcili yardım maşını ilə xəstəxanaya aparıblar. Bu hadisədən qorxan müfəttişliyin işçiləri maşınlarını avtovağzal yaxınlığındakı körpünün altında saxlayıb, qaçıblar. Camaat isə maşının ətrafına yığılıb, maşını yarasız hala salıblar. Hadisə yerinə polis və digər məsul qurumların əməkdaşları gəliblər.

Aznews.az-ın avtovağzaldakı əməkdaşının verdiyi xəbərə görə, müfəttişlər sürücüdən sənədlərini tələb edərkən ikinci ərazidən qaçmaq istəyib və nəticədə körpüdən yıxılıb. Onun vəziyyətinin pis olduğu bildirilir.

Məlumata görə bu hadisə, vətəndaşlarla müfəttiş əməkdaşları arasında insidentə səbəb olub. Hadisə yerinə polis qüvvələri cəlb edilib.

Nəqliyyat Nazirliyi Dövlət Avtomobil Nəqliyyatı İdarəsinin Bakı Regional şöbəsinin rəis müavini Əmrah Cəfərov faktı təsdiqləyib. Onun sözlərinə görə, qanunsuz taksi fəaliyyəti ilə məşğul olan sürücü ilə nəqliyyat müfəttişləri arasında mübahisə yaranıb: “Sürücü əlinə daş alıb əməkdaşlarımıza atıb. Əməkdaşımızın biri ayağından xəsarət alıb”.

Sürücünün körpüdən yıxılaraq xəsarət almasına gəlincə, bu barədə məlumatının olmadığını deyib.